Осиё футболи. Марк Вильмотс Эронни бошқарадими?

Осиё Кубоги якунига етганидан бери орадан уч ой ўтди ҳамки Эрон терма жамоасига янги бош мураббий тайинлангани йўқ. Бу эса мухлисларни янада хавотирга соляпти. 

Маҳаллий нашрларда ёзилишича, терма жамоанинг навбатдаги устози Марк Вильмотс бўлади. Эрон футбол федерацияси раҳбари Меҳди Таж Туркияга бориб Вильмотс билан кўришди деб ёзилади хабарда. Маълум бўлишича, бельгиялик мутахассис йилига 1 ярим миллион доллар маош сўраяпти. 

Агар ушбу сумма Эрон ФФни қониқтирса Марк Вильмотс терма жамоада иш бошлайди. Унга маҳаллий ёш мураббийлардан Жавод Некунам ёрдам беради. Маълумот учун, Вильмотснинг охирги иш жойи Кот-Д'Ивуар термаси бўлиб, 2017 йил ноябрь ойидан бери ишсиз ҳисобланади.