"Олмалиқ": "Бухоро" билан баҳсга доир

Ортга назар ташлаган ҳолда, бу жамоаларнинг ўзаро ўйинлари статистикасидан баъзи маълумотларни ҳукмингизга ҳавола этамиз.

Жамоамиз "Бухоро" билан ўтказган 15 учрашувидан 8тасида ғалаба қозонган, 2 учрашувда дуранг қайд этилган ва 5 ўйинда мағлубиятга учраган. Тўплар нисбати 29-16 жамоамиз фойдасига. Ўзаро ўйинларда жамоамизнинг энг йирик ғалабаси 6:1 бўлса, рақиб жамоа ҳисобида йирик ғалаба қайд этилмаган.

Ҳар икки жамоа сафида ўйнаган футболчилар ҳақида ҳам қизиқ маълумотлар мавжуд. Ўтган мавсум "Бухоро"ни ўз майдонида йирик 4:0 ҳисобида мағлубиятга учратилишида катта ҳисса қўшган Саламат Қутибоев ва Шавкат Саломов бу гал жамоамизга рақиб сифатида майдонга тушди. Турли йилларда гоҳ у, гоҳ бу жамоа сафида Саидкомил Акбаров, Дилявер Абибуллаев, Абдуқаҳҳор Ҳожиакбаров, Андрей Власичев, Шуҳрат Мусаев, Абдураззоқ Жўраев, Георги Квисешвили, Артурас Фоменколар ҳам майдонга тушишган.

Учрашувни бошқариб борган Азиз Асимовнинг ҳам бу икки жамоа ўртасида ўзига хос статистикаси мавжуд. Асимов кеча бўлиб ўтган ўйинни ҳисобга олганда учинчи марта бу икки жамоа қарама-қаршилигида ҳакамлик вазифасини ўтади. Аввалги икки ўйин Олмалиқ шаҳрида ўтган бўлиб, 2013 йил 5 октябрда "Олмалиқ" 3:2 ҳисобида ғалаба қозонган бўлса, 2015 йил 12 сентябрь куни ўтган баҳсда 1:1 ҳисобида дуранг қайд этилган. Эътиборли жиҳати, аввалги ҳар икки ўйинда Асимов сариқ карточкалар билан бир қаторда қизил карточкадан ҳам фойдаланган. 2013 йил 8 футболчига сариқ карточка кўрсатиш билан бирга Санжар Шоаҳмедов ва Алишер Маҳмудовга қизил карточка кўрсатган. Ўтган йил 3 марта сариқ карточка ва "Олмалиқ" аъзоси Саҳоб Жўраев майдондан четлатилганди. Асимов бу гал 6 футболчини огоҳлантириш билан чекланди. Умумий ҳисобда "Бухоро"нинг ўз майдонида Азиз Асимов томонидан бошқарилган ўйинлар сони 6та бўлиб, шундан 4тасида бухороликлар ғалаба қозонишган ва 2 ўйинда дуранг қайд этилган. Асимовнинг Бухородаги илк ўйини 2013 йил "Сўғдиёна" билан 4:1, "Металлург" билан 3:1, 2014 йил "Пахтакор" билан 0:0, 2015 йил "Динамо" билан 1:1, "Нефтчи" билан 3:1 ва 2016 йил "Олмалиқ" билан 2:0. "Олмалиқ"нинг сафар ўйинларида Асимов иккинчи марта ҳакамлик қилди. 2014 йил Бекободда жамоамиз 3:2 ҳисобида мағлубиятга учраганди. Иккинчи ўйин ҳам мағлубият билан якун топди.