Олий лига-2014. Кўзгуда – “Локомотив”

Шу муносабат билан бу йилги олий лиганинг ҳар бир иштирокчисига тўхталишни лозим топдик. “Бунёдкор”дан кейин навбатдаги жамоа “Локомотив”.

Ўтган йилги ўрни: 2
Бош мураббий: Вадим Абрамов
“Локо” катта ниятлар билан жамоа бошқарувига Вадим Абрамовни олиб келди. Кўпчиликнинг айтишича, Абрамовнинг бу жамоада ишлаши олий лигага бўлган қизиқишни орттириб юборади. Чиндан ҳам шундай бўладими-йўқми, буни вақт ўтиб билиб оламиз.

Энг яхши харид: Игнатий Нестеров
“Локомотив” бу йил 9 нафар футболчини ўз сафига қўшиб олди. Албатта, ҳаммаси яхши харидлар, лекин биттасини танлашга тўғри келганда Игнатий Нестеровни кўрсатмасак бўлмайди. Чунки дарвозада Нестеров бор экан, футболчилар майдонда бемалол тўп суришлари мумкин.

Энг катта йўқотиш: Александр Оника
Оника ўтган йилнинг 2-даврасида келган бўлишига қарамай, зўр ўйин намойиш этганди. Лекин нимагадир мураббийлар унинг кетишига йўл қўйиб беришди. Агар Оника жамоада қолганида майдон марказида катта ҳажмдаги ишни бажариши мумкин эди.

Жамоа етакчиси: Виктор Карпенко
“Локо”да жамоа етакчиси сифатида алоҳида бир футболчини кўрсатиш қийин. Шунга қарамай, Виктор Карпенко ҳамон бошқаларга ўрнак бўла оладиган футбол намойиш этмоқда. Бежизга уни Абрамов жамоа сардори этиб тайинламади.

Ўзини кўрсатиши кутилаётган футболчи: Вячеслав Шевченко
Жамоа сафига бу йил келиб қўшилган Вячеслав Шевченко анчагина тиришқоқ экан. Фақат у кўп ҳаракат қилгани билан иш битмайди, мухлислар ва атрофдагилар ундан аввало гол кутишади. Шевченко тез орада ўзини кўрсатса ажаб эмас.

Чемпионатни кимга қарши бошлайди: сафарда “Навбаҳор”
“Локомотив” 1-турни сафарда “Навбаҳор”га қарши ўтказади. Наманганда очилиш ўйини бўлади, демак стадионга кўплаб мухлислар ташриф буюришади. Бизнингча, ўйин ҳам шунга яраша қизиқ кечса керак.

Хайрулла Холиқов.