“Нефтчи” лагерида нима гап?

10 декабрда таътилдан қайтган футболчилар дастлаб беш кун бир маҳалдан шуғулланишди. Кечадан буён машғулотлар кунига икки маҳалдан ўтказила бошлади. Айтиш керакки, ҳозирча таркибда асосан маҳаллий ўйинчилар. Бошқа вилоятлик футболчилар ҳам аста-секин жамоа ихтиёрига етиб келмоқда.



Машғулотлар эрталаб ёпиқ манежда жисмоний тайёргарлик бўйича ўтаётган бўлса, куннинг иккинчи қисмида тўп билан техник ва тактик жиҳатлар борасида бўлмоқда. Режага кўра мазкур йиғин 27 декабрга қадар давом этади. Шундан кейин 3 январга қадар дам берилади. Тайёргарлик режасига кўра “Нефтчи” февраль ойида Туркияда йиғин ўтказади.



Табиийки таркибда юз бериши кутилаётган ўзгаришлар мухлисларнинг диққат марказида турибди. Ҳозирча ишқибозларга шуни айтиш мумкинки, жамоа раҳбарияти собиқ ўйинчиларни қайтариш борасида музокара ўтказмоқда.



Лекин жамоага айна қайси ўйинчиларнинг келиб қўшилиши сир тутилмоқда. Томонлар расман келишувга эришсагина бу ҳақда маълумот берилади. Лекин шуниси аниқки жорий мавсум “Нефтчи” шарафини ҳимоя қилган Вячеслав Пономарёв, Иқбол Бобохонов, Александру Оника, Андрей Акопянц сингари ўйинчилар жамоа хайрлашишни маъқул топган.



Шунингдек бу йил жамоа сафида энг кўп учрашув ўтказган ва шартномаси тугаб бораётган Дилёрбек Ирматов ўзини “Бунёдкор”да синаб кўрмоқчи эканлигини билдирган. Ижара асосида ўйнаган Абдумавлон Абдужалилов (“Пахтакор”) ва Сардор Раҳмонов (“Локомотив”) ўз жамоаларига қайтиб кетган. Уларнинг яна “Нефтчи”га қайтиши ҳозирча аниқ эмас. Ундан ташқари ҳужумчи Рўзимбой Аҳмедовнинг Қозоғистоннинг “Қайсар” клуби кўригидан ўтаётганини айтиш лозим. 



Дарвоқе, мураббийлар штабида ҳам ўзгаришлар юз берган. Бунгача ёшлар жамоасига устозлик қилиб келган Сергей Ковшов, дарвозабонлар мураббийи Вячеслав Томилин ва Хислат Чилматов ҳам жамоа билан хайрлашган. Эндиликда ёшлар жамоасига Баҳром Ҳайдаров бошчилик қиладиган бўлди. Айтиш лозимки, “Нефтчи” ёшлар жамоаси 15 декабрдан йиғинни бошлаган. Шу куни Ҳайдаров ёшлар жамоаси мураббийи сифатида футболчиларга таништирилди.



Ҳозирча расман шартнома имзоланмаган бўлсада, келаси йил дарвозабонлар билан Баҳодир Шамсиддинов ишлайдиган бўлди. Ўз вақтида “Цементчи”, “Атласчи” ва “Андижон” жамоаларида фаолият юритган Шамсиддинов эндиликда мураббий сифатида ўзини синаб кўради.



Шунингдек клуб ижрочи директори Султон Зайлобидинов эндиликда янги ишга тушаётган “Нефтчи” академиясида директор сифатида ишлайдиган бўлди. “Нефтчи” жамоа бошлиғи сифатида Шерзод Раимжонов иш бошлаган.