Мустафо Байрамов: «Навбаҳор»да бош мураббий менман!»

«Навбаҳор» мутасаддилари Байрамовнинг қадли жамоасида мураббий сифатида ҳам ишлаши учун унга имконият беришди. Мана кўп йиллардан буён Мустафо Жеферович Наманган жамоаси мураббийлар штабида меҳнат қилиб келмоқда. Байрамовда «А» тоифадаги мураббийлик лицензияси борлиги унга жуда қўл келмоқда дейиш мумкин. Чунки ушбу лицензия туфайли мураббий ҳамон клубдаги фаолиятини давом эттириб келмоқда. Охирги беш йилни оладиган бўлсак, мазкур жамоада кўплаб мураббийлар ишлаб кетди. Уларни ҳар бирини санаётганда очиғи, адашиб кетасан киши. Ҳаттоки клуб раҳбарияти барқарорликка эришиш мақсадида хориждан ҳам мураббийлар олиб келишди. Уларда керакли лицензия йўқлигини Мустафо Байрамов билинтирмади. Сабаби керакли лицензияга эга бўлмаган бош мураббий қоғозда маслаҳатчи ёки катта мураббий сифатида кўрсатилди. Бош мураббий сифатида эса қоғозда Мустафо Байрамов гавдаланди. Очиғи, бу биргина «Навбаҳор» билан боғлиқ холат эмас. Бошқа клубларда ҳам шунга ўхшаш вазиятни кўриш мумкин.

Бу йилги мавсумга Усмон Асқаралиев бошчилигида тайёргарлик кўрган «Навбаҳор» чемпионатнинг дастлабки ўйинларида қониқарли натижа қайд эта олмади. Оқибатда Асқаралиев соғлиги борасида шикоят қилиб, шифохонага ётиб олди. Шундан сўнг бошқарувчилик тўлалигича Байрамовнинг қўлига ўтди. Аммо оралиқ танаффусда клуб раҳбарлари мураббийлар штабига Роберт Гайни олиб келди. Шундан сўнг кўпчилик бош мураббийлик амалда Гайнинг гардагина юклатилганлиги тўғрисида фикрлай бошлади. Аммо қоғозда ҳануз Мустафо Байрамов бош эканлиги кўрсатилмоқда.
Мустафо Жеферович билан ўзаро муносабатларимиз яхши эканлиги сабабли мураббий бугун шахсий қўл телефонимга тўсатдан қўнғироқ қилди...

• «Негадир, охирги пайтларда ОАВда «Навбаҳор» бош мураббийи сифатида Роберт Гайни айтишмоқда»,  дея гап бошлади Мустафо Байрамов. «Ваҳоланки, аслида жамоада бош мураббий менман!»

- Яқинда, аниқроғи 10 август куни Косонсойда бўлиб ўтган «Навбаҳор»  Нефтчи баҳсини бевосита стадионда кузатиш мақсадида ўйинга борганимизда, бир нарса эътиборимизни тортмасдан қўймади. Яъни, ўйин пайтида Роберт Гай бош мураббийларга хос тарзда кийиниб, майдон четида йигитларга ўзи кўрсатма бериб турди. Боз устига танаффус пайтида кийиниш хонасига ҳам футболчиларни Гай олиб кириб кетди. Сиз эса бу вақтда захирада футболчилар билан машғулот ўтказардингиз. Табиийки буни кўрган ҳар қандай мухлис ҳам амалдаги бош мураббий Роберт Гай эканлигини тушуниб етади.
- Биласизми, ўйинга Роберт Сергеевич кўйлак, шим ва туфли кийиб келади. Шунинг учун қандай қилиб у бундай  холатда майдонга тушиб, захира футболчилари билан машғулот ўтказди! Гай «Навбаҳор»да катта мураббийдир! Бош мураббий эса менман! Танаффус чоғида ўйинчиларга кийиниш хонасида Гай кўрсатма бераётганида, захирадаги йигитларни ўзини ташлаб кетмасдан, улар билан мен шуғулламан. Мухлислар нима деб ўйлашса, ўйлайверишсин.

- Қаерда кўргансиз, катта мураббий костюм шимда, бош мураббий спорт кийимларида ўйинга келганини?!
- Айтдимку, Гай шундай кийинади деб! Балки бу унинг имиджи бўлиши мумкин. Бу борада ундан сўраганингиз маъқул. Менга костюм-шим кийиб, галстук тақиш ёқмайди. Шунинг учун доим спорт кийимларидан фойдаланаман. Яна қайтараман, «Навбаҳор»да бош мураббий менман!   

Исломбек Рустамбеков