Метродан чиққан мураббий

Ҳар икки жамоа учрашувга охирги тайёргарликни олиб бораётган бир пайтда меҳмонлар бош мураббийи Маҳди Али тўғрисида турли қизиқарли маълумотлар билан ўртоқлашишга қарор қилдик. Ҳозир осиёлик мураббийлар орасида энг катта ўсишга эришганларидан бири сифатида баҳоланаётган Али аслида ҳозир Дубай амирлигида юқори лавозимдаги шахслардан бири бўлиши ҳам мумкин эди.

Маҳди Али футболчи сифатида яхши натижаларга эришган. У миллий терма жамоа шарафини ҳам ҳимоя қилган. Ҳар бир бажараётган ишини пухта қилишга ўрганган Маҳди учун шу энг муҳим бўлган. Унинг ҳозирги муваффақиятлари замири остида айнан ўша принцип турибди. Дубай амирлик ҳокимиятида ишлаган вақтида у йўл транспорт бошқармаси фаолиятига ҳам ёрдам берган, шунингдек, Дубай паркинг (машиналар қўналғаси) лойиҳаси ва Дубай метроси чипталар тизимини ишлаб чиққан. Мураббий учун жуда ҳайратланарли жиҳатлар, шундай эмасми?



46 ёшли мутахассис фаолияти турли соҳалар орқали шаклланган. Шу билан бирга Маҳди Али ҳамиша ғалабаларга эришиб келган.

“Футбол менинг энг ёқтирган ишим, лекин ҳар қандай ишни бажаришда 100 фоиз кучимни берганман. У мураббийлик бўладими ёки йўл транспорт бошқармасими, фарқи йўқ. Ҳаётим давомида Дубайга оид турли лойиҳаларда иштирок этганман. Мураббийликни ҳам турли лойиҳалар йиғиндисига ўхшатиш мумкин. Одамлар билан келишиб ишлашга ўрганганман, бу эса футболда менга асқотади”.

БАА футболининг “олтин авлоди” деб баҳоланаётган терма жамоа аъзолари фаолияти Маҳди Али номи билан чамбарчас боғлиқ. У ёшлар миқёсидан бошлаб муваффақиятларга эришиб келяпти. Осиё чемпионлиги, кейинчалик жаҳон чемпионатида чорак финал, Осиё ўйинларида иккинчи ўрин, “Кўрфаз Кубоги”даги чемпионлик буни исботлаб турибди.
“Ушбу футболчилар билан деярли ўн йилда бери биргаман ва ўйинчиларнинг имкониятини яхши биламан. Бу эса менга катта ёрдам беради”.

Али 2003 йил БАА ўсмирлар терма жамоаси мураббийи этиб тайинланганди. Мураббийлик фаолиятини Маҳди 1998 йил бошлаган. Ўшанда у Дубайнинг “Ал Аҳли” клубида 10 ёшли болалар билан ишлашга киришганди. Али жамоа раҳбариятининг менежер ёки раҳбарлик лавозимларидан бирида фаолият олиб бориш таклифини рад этиб, маъмурий лавозимда ишлай олмаслигини билдирганди. У ҳамиша тўп билан ишлаш жараёнида бирга бўлишни хоҳлаган. Қуйи тизимдан иш бошлаган Али миллий терма жамоа бош мураббийи даражасига кўтарилди. 2000 йил Лондонда мураббийлик сертификатини қўлга киритган Маҳди кейинчалик Германияда “А” лицензияси учун таҳсил олди. 2008 йил эса унга ёшлар терма жамоасини бошқариш таклифи билан БАА ФА мурожаат қилди. Бу пайтда Али Дубай амирлиги ҳукуматида ишларди. Ўша пайтда у таътилда бўлгани сабабли ассоциация таклифини қабул қилганди. Чунки бутун вақтини ишга бағишлаш имконияти юзага келгани сабабли бунга розилик билдирган.



Ёшлар термаси билан Осиё чемпиони бўлгач, Али жамоани бошқаришда давом этишига рухсат бериши учун Дубай амири Шайх Муҳаммад Бин Рашидга мурожаат қилган. Мисрдаги мундиалда жамоа билан чорак финалга етиб боргач, унга мураббийлик фаолиятини давом эттиришига рухсат беришган. Агар воқеалар жараёни сал бошқачароқ кўриниш олса, бугун биз бу мураббийни билмасдик ва БАА терма жамоаси бу қадар катта ўсишга эришмаган бўларди. Чунки унгача ишлаган машҳур мураббийлар айтарли натижаларни қўлга киритишмаган. Али эса ёшларни миллий термага жалб қилиб, жамоавий ўйинни янги савияга олиб чиқди. Олимпия терма жамоасини Лондондаги Олимпиада ўйинларига бошлаб борди. Шу ўринда мураббийдаги интилиш ва профессионалликка қойил қолиш керак. Барча ҳам ҳукуматда эгаллаб турган лавозимидан кейин мураббийлик ишига қайтиб, таваккал қилишни истамайди. Ғалабаларга эришиш эса умуман бошқа масала. Лекин Маҳди Али барчасини уддалай олди. БАА терма жамоаси сўнгги йиллардаги энг чиройли ўйинини намойиш этиб, ФИФА рейтингида юқорилади.

“Мен футболчи сифатида ҳамиша халқаро учрашувларда ўйнашни истаганман. Бироқ жароҳат туфайли фақат ўртоқлик ўйинларида иштирок этганман. Ўшанда бундан роса афсусланганман. Лекин энди юқори натижаларга мураббий сифатида эришишни хоҳлайман. 1990 йил БАА терма жамоаси жаҳон чемпионатида қатнашган. Ўшанда умумий таркибда бўлгандим, аммо жамоа Италияга жўнаб кетишидан бир ҳафта аввал жароҳат сабабли сафдан чиққанман”.

Маҳди Али “Ал Аҳли” таркибида икки марта Президент Кубогини қўлга киритган. 1988 йилги финалда “Ал Шабаб” мағлуб этилишида асосий ролни ўйнаган. Унинг жамоаси 10 футболчи билан қолган пайтда у икки тўп киритиб, бир бор голли пас оширган. Натижада “Аҳли” 3:2 ҳисобида ғалаба қозонган. Лекин айнан ўша финалда майдонга тушгани сабабли Ал Айн Университетида имтиҳонларини ўтказиб юборган. Уларда паст балл тўплагани учун Дубай ҳокимиятида оддий хизматчи сифатида ишлашга киришган. Лекин ишидан қониқмагани туфайли бир йилдан сўнг яна ўқишни бошлаган. Бу сафар Дубай технология коллежини электр инженер мутахассиси сифатида тамомлаган. Кейинчалик яна ҳокимиятга ишга қайтган Маҳди бир қатор лойиҳаларни муваффақиятли амалга оширган. Мураббийлик ишига қайтиши қандай содир бўлгани тўғрисида тўхталиб ўтдик. Клублардан “Банияс”да вақтинча фаолият кўрсатиб, клубни кумуш медаллар сари етаклаган. Ўша пайтда олимпия терма жамоасига номзод 6 футболчи билан “Банияс”да ҳам ишлагани кейинроқ унга терма жамоадаги фаолиятида асқотди. Маҳди Али ўсмирлар, ёшлар, олимпия ва миллий терма жамоада ишлашга улгурди. Инқирозга тушиб қолгандек кўринган БАА терма жамоасини Осиёдаги етакчи термалар сафига қайтарган Алининг мақсади Осиё Кубогида яхши натижага эришиб, жаҳон чемпионати финал босқичига чиқиш учун курашишдан иборат.



Биз ушбу мутахассис фаолиятини бошқаларга ибрат бўлиши учун ёритиб ўтдик. Яъни, қайсидир лаҳзада бирор инсонга билдирилган ишонч кейин катта ғалабаларга олиб келиши мумкин. Фақат футболда эмас, барча соҳаларда.


Беҳзод НАЗАРОВ.