"Машъал" йиғинида бир қатор ёшлар иштирок этмоқда

13 декабрдан машғулотларга киришган "Машъал" сафида кўплаб ёшлар ҳам иштирок этмоқда. Асосий таркиб билан бир қаторда клуб академиясининг тарбияланувчилари ҳам машғулотларни олиб бормоқда. Бу ёшлар асосан ёшлар лигаси ва биринчи лигамиз жамоасидан жалб этилди.
 
Таркибга ўтган мавсум "Шўртан"да ижара асосида тўп сурган Дурбек Камолов ва Мақсуд Маҳмудовлар қайтди.

Ундан ташқари биринчи лигадаги "Машъал-2" сафидан дарвозабон Ҳусан Олимжонов, футболчилар Шоҳжаҳон Қиличев, Ҳумоюн Муртозаев, Турсунмурод Ҳамдамов, Бобур Тўраев, Аслиддин Абдиев. Сардор Абдураимовлар ҳам жалб этилди ва машғулотларда иштирок этмоқда.

Ёшлар жамоаси таркибидан эса Шоҳруҳ Достонов, Сирожиддин Аллаев, Сирожиддин Раҳматуллаев, Ихтиёр Тошпўлатов, Холмурод Холмуродов каби футболчилар ҳам асосий таркиб билан Янгиердаги машғулотларда иштирок этиб келмоқда.

Бугун жамоамиз Тошкентда "Пахтакор" клубига қарши назорат учрашувини ўтказади. Баҳс 13:00 да Қибрайда бўлиб ўтади.