ЖЧ-2022 саралаш. Эртага Саудия Арабистони бошлайди

Ўзбекистон терма жамоаси қуръа жараёнида иккинчи саватчадан жой олгани боис бу турда дам олади. Лекин эртага биринчи саватчадаги жамоалар ўз юришини бошлайди. Айтиш мумкинки, мана энди курашга жаҳон чемпионатига бориш учун ҳақиқий даъвогарлар қўшилади. 

Гуруҳимиздаги энг кучли рақиб Саудия Арабистони эртага сафарда Яман меҳмони бўлади. Яманда сиёсий нотинч вазият туфайли учрашув Баҳрайнда ташкил этилади ва бизнинг вақт билан 17:00да бошланади. Яман 1-турда Сингапур билан дуранг ўйнади. 

Эртанги ўйин франциялик мураббий Эрве Ренар учун дебют ҳисобланади. Чунки ушбу мутахассис Саудия Арабистони бош мураббийи сифатида илк расмий учрашувини ўтказади. 

Эртага шунингдек, Сингапур - Фаластин беллашуви ҳам бўлиб ўтади. Сингапур кетма-кет иккинчи бор ўз майдонида ўйнайди. Бу жамоалар ўйини 16:45да старт олади. Фаластин бош мураббийи Нуриддин Оулд Али шундай деди: "Ўзбекистон устидан қозонилган ғалабани унутиб, бор эътиборни навбатдаги баҳсга қаратишимиз керак. Футболда ўтмишдаги ютуқлар билан яшаш керак эмас. Мен бу ҳақда футболчиларга ҳам айтдим". 

Демак, эртага гарчи миллий терма жамоамиз ўйин ўтказмаса-да, гуруҳдаги вазиятни билиш учун иккита ўйинни диққат билан кузатиб борамиз.