ЖЧ-2022 саралаш. БАА терма жамоаси шу ойда йиғин ўтказади

Йиғин 22 июлдан старт олади. Бу ҳақда БАА футбол ассоциацияси расман маълум қилди. Хабарингиз бор, ушбу терма жамоани яқинда колумбиялик мураббий Хорхе Луис Пинто қабул қилиб олганди. 22 июль куни бошланадиган ўқув-машғулотлар янги мураббийнинг илк йиғини бўлади. 

27 июлга қадар мўлжалланган йиғинда футболчилар асосан машғулот ўтказишади. Кейинчалик 1-23 август оралиғида навбатдаги йиғин ташкил этилади. Ушбу йиғинда БАА терма жамоаси иккита ўртоқлик учрашуви ўтказади.

Учинчи йиғин эса 31 август - 9 сентябрь оралиғида бўлиб ўтади ва бунда ҳам иккита ўртоқлик ўйинида майдонга тушиш кўзда тутилган.

Эслатиб ўтамиз, БАА терма жамоаси ЖЧ-2022 саралаш босқичида 6 очко билан тўртинчи ўринда боряпти. Амирлик футболчилари навбатдаги учта баҳсни Индонезия, Таиланд ва Вьетнамга қарши ўтказишади.