"Динамо" тақдимот маросими ўтказди

"Самарқанд шаҳридаги Ёшлар маркази катта залида ўтказилган маросимда жамоадан ташқари, клуб раҳбарияти, вилоят ҳокимлиги, мухлислар ҳамда ОАВ вакиллари иштирок этди. Маросим давомида клуб матбуот хизмати томонидан "Динамо"нинг энг муҳим голлари ёдга олиниб, ҳар бир футболчи ўзига хос тарзда таништирилди. Эътиборлиси, таништирув маросимига Самарқанд вилояти ҳокими, вилоят футбол ассоциацияси президенти Адиз Бобоев ҳам вақт топиб, кечроқ бўлса-да, етиб келганини бутун зал қарсаклар билан қарши олди. Унгача футболчиларга янги либосларни Самарқанд вилояти ҳокими ўринбосари Ҳусан Тўхтаев ва бош мураббий Вадим Абрамов мухлисларнинг олқишлари остида топширишди.

"Динамо" жамоамизни биргаликда қўллаб-қувватлаймиз! Вилоят аҳли ва барча самарқандлик футбол мухлисларининг "Динамо"дан умиди катта. Вилоят ҳокимлиги томонидан қандайдир ёрдам керак бўлса, биз тайёрмиз. Стадионимиз барча талабларга жавоб беради, маблағ масаласида ҳам жамоада муаммо йўқ. 2025 йилги мавсум "Динамо" учун муваффақиятли бўлсин. Жамоамизга омад ва зафарлар тилаймиз!", - деди вилоят ҳокими вазифасини бажарувчи Адиз Музаффарович. 

Шундан сўнг, Вадим Абрамов жамоа номидан Адиз Бобоевга 72-рақамли клуб либосини совға қилди. Тадбирда клуб бош ҳомийси "Agromir Buildings"га вилоят ҳокимлиги ва жамоа номидан миннатдорчилик билдирилди. Фахрий мухлислар номидан Ҳамроқул Рофеев, ашаддий ишқибозлар номидан фан-клуб раҳбари Шавкат Бурҳонов сўзга чиқиб, бу йил "Динамо"ни ўзгача тарзда қўллаб-қувватлаш мақсад қилинганини айтиб, мухлислар номидан вилоят раҳбарига миннатдорчилик билдирди. Маросим якунида барча мухлислар 15 март кунги "Динамо" - «Машъал» ўйинига таклиф этилди", — дейилади клуб хабарида.