"Динамо" Самарқанд футболи музейида бўлди

Уч йиллик фаолияти давомида музей яна бир қанча тарихий экспонатлар билан бойиди.

Куни кеча Илҳом Шарипов бошчилигидаги «Динамо» жамоаси ушбу музейга ташриф буюришди. Ташриф давомида хизмат кўрсатган спорт устаси, футбол фахрийси Валерий Мамажонович «Динамо» футболчиларига Самарқанд футболининг ўтмиши ҳақида гапириб бериб, клуб вилоят футболи мавқеини ошириши лозимлигини уқтирди.

«Илҳом Шарипов жамоага бош мураббий этиб тайинлангач, клуб асоси маҳаллий ёшлардан ташкил этилгани ва жамоа айни дамда ўз олдига қўйилган мақсад – Олий Лигага чиқиш учун яхши имкониятга эга бўлиб тургани бизни хурсанд этмоқда. Чунки, биринчи ўринда пойдевор яхши қўйилиши керак. Натижа ҳам шундан кейин бўлади. Бугун жамоа аъзоларининг вилоятимиз футболи музейига ташриф буюрганидан жуда хурсанд бўлдим. Ёш футболчиларимиз Самарқанд футболи улкан ва ёрқин тарихга эга эканлигини билиб, вилоятимиз футболи шон-шуҳрати учун курашишлари лозим. Самарқанд футболи 56 йиллик тарихи давомида Европадаги Франция, Венгриядан тортиб, Осиёдаги Вьетнам мамлакатида бўлиб, зафарли натижаларга эришиб қайтганлигини билишлари керак. Зеро, тарихсиз келажак бўлмайди» - дейди Валерий Қодиров.

Футболчилар музейдаги машҳур дарвозабон Лев Яшин, бокс қироли Муҳаммад Алининг Самарқанддаги ташрифи, «Динамо» жамоасининг ярим асрлик даври давомидаги ютуқларини кўриб катта таассуротлар олишди.