«Динамо» - «Бунёдкор»: Самарқанддаги тарих ўзгарадими?

Cўнгги турда амалдаги чемпион “Локомотив”ни мағлуб этган “Динамо” бу сафар Вадим Абрамов қўл остидаги Тошкентнинг “Бунёдкор” жамоасини қабул қилади.

Суперлига. 13-тур.
28 июнь, жума
ДИНАМО — БУНЁДКОР
Самарқанд, “Динамо” стадиони.
Ҳакамлар: Аҳрол Рисқуллаев, Руслан Серазитдинов, Александр Сидоров, Фирдавс Норсафаров
Назоратчи: Маъмур Саидқосимов
Комиссар: Шерзод Ражабов
ТВ-трансляция: Спорт ТВ
Чипта нархи: 10 000 сўм.
Ўйин вақти: 18:00

Ким қандай ҳолатда?
“Динамо” жамоаси жорий мавсумда Самарқанддаги ўйинларда мағлубият нималигини билмаяпти. Даврон Файзиев жамоаси ушбу турда ҳам ушбу ёқимли анъанани давом эттиришга интилишади. Клуб айни дамда 18 очко жамғарган ҳолда тўплар нисбатига кўра 6-ўринни банд этиб турибди.
Вадим Абрамов бошчилигидаги “Бунёдкор” ҳам Суперлигада 18 очко жамғариб, голлар нисбатига кўра, “Динамо”дан кейинги 7-ўринни банд этиб турибди. Ўтган тургача 3-ўринда бўлган “Қалдирғочлар” сўнгги турда Термизда мағлубиятга учраб, 7-ўринга пастлаганди.

“Динамо”нинг сўнгги беш турдаги ўйини:
8-тур. “Динамо” – АГМК – 1:0
9-тур. “Бухоро” – “Динамо” – 0:0
10-тур. “Динамо” – “Қизилқум” – 2:2
11-тур. “Қўқон-1912” – “Динамо” – 2:2
12-тур. “Динамо” – “Локомотив” – 2:1

“Бунёдкор”нинг сўнгги беш турдаги ўйини:
8-тур. “Бунёдкор” – “Қўқон-1912” – 2:1
9-тур. “Локомотив” – “Бунёдкор” – 0:0
10-тур. “Металлург” – “Бунёдкор” – 0:2
11-тур. “Бунёдкор” – “Насаф” – 1:1
12-тур. “Сурхон” – “Бунёдкор” – 2:0

ЎЗАРО ЎЙИНЛАР: 21-ТЎҚНАШУВ
Олий Лига тарихида «Динамо» ва «Бунёдкор» клублари ўзаро бугунгача 20 марта тўқнаш келишган. Самарқанддаги ўйин 21-тўқнашув сифатида тарихда қолади. Ушбу баҳсда “Динамо” “Бунёдкор”га қарши Самарқанддаги тарихни ўзгартириш мумкин. Сабаби, “Бунёдкор” тарихда Самарқандда мағлуб этилмаган.

Ўзаро учрашувлар тарихи статистикаси «Бунёдкор» устунлигини кўрсатмоқда. “Бунёдкор” 16 та ўйинда ғолиб бўлган, 3 та ўйин дуранг ҳисобида якунланган. “Динамо” ушбу рақибни ҳозиргача бир марта мағлуб этган – 2014 йилда Тошкентда Азамат Бобожоновнинг 90+4-дақиқада киритган голи эвазига.

Тўплар нисбатида ҳам устунлик “Бунёдкор” томонида - 38:9. Ўзаро ўйинларда “Динамо” 6, “Бунёдкор” эса 51 очкони қўлга киритган.

“Бунёдкор”нинг ўзаро ўйинларда қозонган энг йирик ғалабаси – 4:0га тенг. “Динамо”нинг ягона ғалабаси – 1:0.

Самарқандда бўлиб ўтган ўзаро сўнгги олти учрашув:
12.10.2017 «Динамо» - «Бунёдкор» 0:2
12.10.2015 «Динамо» - «Бунёдкор» 1:1
06.04.2014 «Динамо» - «Бунёдкор» 0:2
18.04.2013 «Динамо» - «Бунёдкор» 0:3
21.05.2012 «Динамо» - «Бунёдкор» 0:1
15.04.2011 «Динамо» - «Бунёдкор» 0:1

Эски танишлар...
Бугунги кунда “Динамо”да фаолият юритаётган Воҳид Шодиев ўз вақтида “Бунёдкор” сафида тўп сурган. “Қалдирғочлар” таркибида ҳам собиқ “динамочилар” бор. Хусусан, самарқандлик ҳимоячи Анвар Ғофуров бир неча мавсумдан буён “Бунёдкор”да тўп сураётган бўлса, Жавоҳир Қаҳрамонов 2017 йилда айнан “Динамо”даги ўйинлари билан мухлисларга танилган бўлса, Суҳроб Иззатов ўтган йили Про-Лигада “Динамо”нинг асосий футболчиларидан бирига айланганди.