Даврон Файзиев: "Бугунги ғалаба олий лигада қолишимиз учун замин яратади"

- Андижон футбол клуби шаҳарга етиб келганимизда бизни илиқ кутиб олди. Бу бизни хурсанд қилди. Бунинг учун клуб мутасаддиларига миннатдорчилик билдириб қоламан  дея гап бошлади Даврон Файзиев.

- "Андижон"нинг иккита ўйининин кузатгандим. Тошкентда "Локомотив" ва Наманганда "Навбаҳор"га қарши ўтказган баҳсини кўргандим. Шу ўйинлардан келиб чиқиб, имкон қадар пухта тайёргарлик кўришга ҳаракат қилдик. Сафарга фақат ғалаба учун боришимизни шогирдларимга уқтиргандим.

- Бугун ҳар иккала жамоага ҳам ғалаба сув ва ҳаводек зарур эди. Агарда бугун ғалаба қозонсак бу олий лигада қолиш имкониятимизни оширарди.

- Ўйиндан олдин йигитларда айтгандимки, биз охирги марта 1999 йили Андижондан ғалаба билан қайтгандик. Шунда 2:1 ҳисобида ютган эдик. У пайтда "Сўғдиёна"да футболчи сифатида ўйнаганман.

- Бугун йигитларга ғалаба қозонишимиз муҳим эканлигини уқтиргандим. Учрашув қизиқарли руҳда кечди. Ўз майдонингда деворлар ҳам ёрдам беради деган гап бор. Бугун андижонлик ашаддий ишқибозлар жамоани қизғин қўллаб-қувватлади. Бу еда мухлислар азалдан севимли жамоасини қўллаб қувватлаб келган. Уларга гап бўлиши мумкин эмас.  

- Биз қарши ҳужумларга таянган холда ўйнадик ва мақсадимизга эришдик.

- Таркибимизда номдор ўйинчи йўқ. Биз бундай таниқли ўйинчиларни ўзимиз кашф этмоқдамиз.

- Вазиятга ҳар доим реал қарайман. Бугунги ғалаба олий лигада қолишимизга замин яратади. Турнир жадвали биз учун осон келмади. Кейинги турда "Пахтакор"га қарши ўйнаймиз. Бугунги ғалабани тезрок унутиб келгуси учрашувга янада жиддий тайёргарлик кўришимиз керак бўлади. Биринчи давранинг дастлабки турларида кўплаб очколарни йўқотдик. Энди иккинчи даврада кўпроқ очко жамғаришга интиламиз. Биз кучлилар сафида қолиш учун бор имкониятимизни ишга соламиз.

- Йигитлар берилган кўрсатмаларни бехато бажаришди. Фақат иккинчи бўлимда Ориповни мажбуран алмаштирдик. Унинг ўрнига ҳужумчи Абдураҳмоновни туширганимнинг сабаби вазият шуни тақозо этди. Бизда Аюбхон Нўъмонов универсал футболчи. Ҳимоя ва ярим ҳимояда ҳам бир хил савияда ўйнай олади. Шу боис уни иккинчи бўлимда орқароқда ўйнашини уқтирдим. Олдинга эса Абдураҳмонов ўтди. Суҳроб Бердиев унинг ортидан ўйнади. Муҳими бу қилинган ўзгариш ўзини оқлади.

- Жамоамиздаги шароитлар олий лига клублари билан таққослаганда, энг пастки ўринни оламиз. Чунки бу йил шаҳримизда бунёдкорлик ишлари кетмоқда. Асосий ўйинларимизни Зоминда ўтказяпмиз. Ёшлар лигаси баҳслари эса Янгиерда бўлмоқда. Умид қиламизки, келгуси йил бу борада шароитлар ижобий томонга ўзгаради.

- Ўйиндан олдин вилоятимиз хокими қароргоҳимизга ташриф буюриб, бизни қўллаб-қувватлади ва жамоани олий лигада қолиши учун шароитларни яратиб беришини айтди. Вилоят хокимининг ушбу гапларидан кейин бу бизга руҳан куч бағишлади. Йигитларни ҳам ўйинида ўзгариш кузатилди", -  дейди Файзиев.
 

Исломбек Рустамбеков