“Бухоро” клуби ҳам “Саратондан соябон бўл” акциясига қўшилди

“Бухоро” футбол клуби ҳам ушбу акцияга қўшилди. Бугун клуб раҳбарияти, жамоа мураббий ва футболчилари Бухоро вилоят онкология диспансери ва Бухоро вилояти болалар кўп тармоқли тиббиёт марказиларида бўлиб, бемор болажонлар холидан хабар олишди.

Клуб матбуот хизматининг маълумот тақдим этишича, ёш беморларга хайрия маблағлари ажратилиб уларга совғалар улашишди. Мақсад – жамиятнинг эътиборини ушбу муаммога жалб қилиб, кичкинтойлар, катталар, шифокорлар ва бировнинг қайғусига бефарқ бўлмаган инсонларнинг биргаликдаги ҳакаратлар билан саратон касаллиги устидан ғалаба қозониш мумкинлигини намойиш қилишдан иборат.

Таъкидлаш жоиз, Суперлиганинг 9 ва 10-тур беллашувларида жамоалар мазкур акция доирасида қатор тадбирларда иштирок этади. Саратонни енгиб ўтиш каби машаққат билан курашаётган жажжи қалбларни футбол мухлислари ҳам қўллаб-қувватлашлари мумкин. Юқоридаги турлар давомида ҳар бир стадионга хайрия қутилари ўрнатилади. Уларда йиғилган маблағлар эса ўша ҳудуддаги онкология марказларига ўтказиб берилади.