Бугун катта футбол. "Қўқон-1912" - "Локомотив"

Бунда чемпионлик учун курашаётган "Локомотив" сафарда "Қўқон-1912" меҳмони бўлади.

Агар бугун "Локо" ғалаба қозонгудек бўлса турнир жадвалида яна биринчи ўринга кўтарилиб олади. Ҳозирча "Бунёдкор" 26 очко билан биринчи, "Локо" эса 25 очко билан иккинчи ўринда бормоқда. Бугунги рақибимиз "Қўқон-1912" олий лигада қолиш учун ҳаракат қилмоқда.

Олий лига. 10-тур. 30 май.
"Қўқон-1912" - "Локомотив"

Бошланиш вақти: 17:30
Бош ҳакам: Шерзод Қосимов

Турнир жадвалидаги ўрни: "Қўқон-1912" 15-ўрин (6 очко), "Локомотив" 2-ўрин (25 очко)
Очколар орасидаги фарқ: 19

Таъриф: Айтиб ўтганимиздек, чемпионлик учун курашаётган ва элитада жон сақлаш учун ҳаракат қилаётган жамоалар баҳси. Учрашув қизиқ кечишини тахмин қилиш қийин эмас. Ўтган йил "Локомотив"нинг чемпионликдан маҳрум бўлимшига қайсидир маънода Қўқонда кечган ўйин ҳам сабаб бўлганди. Ўшанда "темирйўлчилар" 2:0 ҳисобида олдинда бораётиб, якунда дуранг ўйнашганди. Бугунги беллашув қандай кечишини эса вақт кўрсатади.
 
Факт:"Қўқон-1912" ҳисобида атиги иккита ғалаба бор ва иккаласи ҳам уйдаги учрашувда қайд этилган. Жамоа ўз майдонида "Обод" ва "Андижон"ни мағлуб этган. Шундан кейин қўқонликлар қаторасига олтита беллашувда имкониятни бой беришди. Жамоа ўз майдонидаги охирги учта ўйинда фақат ютқазди. "Локомотив" эса сафарда мағлубият нималигини билмай келмоқда. Жамоа бунгача сафарда бешта учрашувда майдонга тушиб, тўрттасида ғалаба қозонди ва бир бор дуранг қайд этди. Бундан ташқари, "Локо" 23 гол билан олий лигада энг кўп тўп киритган жамоа бўлиб турибди.

Эслатма: Кеча бўлиб ўтган "Қўқон-1912" ҳамда "Локомотив" ўринбосарлари иштирокидаги Ёшлар лигаси баҳсида "локочилар" 2:0 ҳисобида зафар қучишди. Бунда Қувондиқ Рўзиев билан Бобир Тиллабоев гол муаллифи бўлишди.