Бахтиёр Ашурматов: "Мавсум бошидаёқ "Навбаҳор"ни қизиқарли ўйинлар кутиб турибди"

"Бугун ўтган йилги мавсум якунлари бўйича йиғилиш бўлиб ўтди. Камчиликларни йўқотиш борасида керакли ишлар олиб борилиши кераклиги айтиб ўтилди.

Қуръага келсак "Навбаҳор" мавсумни ўз майдонида вице-чемпион "Локомотив"га қарши ўйин билан бошлайдиган бўлди. Бу жамоанинг қандай кучга эканлигини барча билади. Иккинчи турни Фарғонада "Нефтчи"га қарши ўтказилади. Водий дербисига ортиқча изоҳ бериш шарт эмас. "Навбаҳор" мухлисларини чемпионатнинг бошида қизиқарли ўйинлар кутиб турибди. Агар клуб асосий таркиби сақлаб қолинса ва бир қатор кучли футболчилар харид қилинса бу икки ўйинда ҳам ғалаба қозониши мумкин.

Кейинги йил легионер дарвозабонлар бўлмаслиги эълон қилинди. Менимча бу тўғри қарор. Сабаби олимпия терма жамоаси сафидаги ҳеч бир дарвозабон бу йил олий лигада ўйнамади. Бу Олимпиада йўлланмаси учун курашаётган жамоанинг энг асосий муаммоаси ҳисобланади. Бундан терма жамоаларимиз фақат ютишади. Бу қарордан сўнг олий лига клублари маҳаллий посбонларга кўпроқ имконият беришади, ёш дарвозабонлар етишиб чиқишади.

Ўзимнинг кейинги тақдиримга келсак, ҳозирча деярли ҳеч нарса маълум эмас. Жамоада 100 фоиз қолдим дея олмайман. "Навбаҳор" раҳбарияти билан бу борада гаплашиб олишим керак. Айнан ўша учрашувдан сўнг кўп нарса маълум бўлади, - дейди Бахтиёр Ашурматов.

Нарзулла Сайдуллаев