АПЛ. "Бургутлар" "тулкилар"ни овлайдими, "арилар" эса "оққушлар"ни таламоқчи. 33-тур превьюси

Турнинг марказий баҳси бўлган "Манчестер Юнайтед" - "Челси" қарама-қаршилигига бағишланган превьюни сайтимиз орқали эртага ўқишингиз мумкин бўлади. Қуйида турнинг қолган ўйинларига бағишланган превьюни эътиборингизга ҳавола этамиз.

АПЛ, 33-тур
"Тоттенхэм" – "Борнмут"
15.04.2017, 16:30
"Уайт Харт Лэйн"
Бош ҳакам: Майкл Оливер (Нортумберленд)

Айни пайтда Англияда энг яхши формада бўлган "Тоттенхэм" бугун "Борнмут"ни меҳмон қилади. "Шпорлар" уйда 11та ўйиндан бери фақат ғалаба қозонишаяпти. Агар бугун ҳам Поччеттино шогирдлари ютуқни ўзлариники қилишса, клуб тарихида уйда кетма-кет ғалабалар рекордини такрорлашади. 1919/1920 йилги мавсум жамоа уйда тинимсиз 12та ғалабани қўлга киритган.

"Борнмут" эса олтита ўйиндан бери сафарда ғалаба қозона олмаяпти. Бу учрашувда катта устунлик мезбонлар томонида бўлади. Меҳмонлар эса ўйинни ҳимоядан қуришларига тўғри келади.

Қизиқ:

- "Тоттенхэм" Премьер-лигада "Борнмут"га қарши учта ўйиннинг иккитасида ғалаба қозонган (2 ғалаба, 1 дуранг), ана шу беллашувларда саккизта гол уриб, битта гол ўтказиб юборган;
- Харри Кейн "шпорлар"нинг "Борнмут"га урган саккизта голидан бештасига муаллифлик қилган (63 %);
- Фақат Ромелу Лукаку (13) ва Харри Кейн (11) 2017 йил Премьер-лигада Жошуа Кинг ва Деле Алли (10та)дан кўпроқ гол урган;
- "Тоттенхэм" фақатгина 1919/1920 йилги мавсумда (12) бир мавсум давомида уйда кетма-кет ғалаба қозониш борасида жорий мавсум (11)дан яхшироқ натижа кўрсатган.



"Кристал Пэлас" – "Лестер"
15.04.2017, 19:00
"Селхерст Парк"
Бош ҳакам: Майк Дин (Хесволл)

Мавсум давомида мураббий алмашганидан кейин супер формага кириб олган иккита жамоанинг ўзаро тўқнашуви. Ҳар икки клуб 2017 йилнинг ўзида Премьер-лигада 15 очкодан жамғарди. Катта Сэм "Пэлас"ни инқироздан олиб чиқиб кетди. Унинг учун бу одатий ҳолат, у доимо инқирозга тушиб бораётган клубларни жонлантира олган.

"Лестер" эса "Эвертон" ва "Атлетико"дан қабул қилиб олинган иккита мағлубиятдан кейин яна уч очко учун курашади. Бу қарама-қаршиликда имкониятлар тенг деб баҳолаш мумкин.

Қизиқ:

- Бугун "бургутлар" тарихда илк бор Премьер-лигада ўз майдонларида кетма-кет тўртта ўйинда ғалаба қозонишлари мумкин;
- Фақатгина "Тоттенхэм" (18) АПЛда охирги олтита ўйинда "Кристал Пэлас" ва "Лестер" (15 очкодан)дан кўпроқ очко жамғарган;
- Уилфрид Заа яна битта голли пас берса, "Пэлас" таркибида бир мавсумда кўп голли узатмани амалга ошириш борасидаги етакчи Уейн Раутлежга етиб олади (2004-05 мавсумда 9та голли пас).



"Эвертон" – "Бернли"
15.04.2017, 19:00
"Гудисон Парк"
Бош ҳакам: Марк Клаттенбург (Ньюкасл-апон-Тайн)

"Эвертон" сўнгги пайтларда уйда ҳақиқий йиртқичга айланди, "Бернли" эса сафарда бу мавсум умуман ютмаган. Куман шогирдларининг ҳозирги ҳолатидан келиб чиқиб мезбонларни яққол фаворит дейиш мумкин. Лукаку айни пайтда ўзининг энг яхши формасида ва у бугун Майкл Кин бошчилигидаги ҳимоя қўрғонига катта ташвиш келтириши мумкин.

Қизиқ:

- "Эвертон" Премьер-лигада "Бернли"га қарши олдинги иккита уй учрашувида ҳам рақибни нолга ўйнаб мағлуб этган;
- "Бернли" бу мавсум АПЛда 16та сафар учрашувида бор йўғи 4 очко йиққан (0 ғалаба, 4 дуранг, 12 мағлубият);
- Том Хитон жорий мавсум Премьер-лигада энг кўп сейвни амалга оширди (120та).



"Сток Сити" – "Халл Сити"
15.04.2017, 19:00
"Британниа"
Бош ҳакам: Стюарт Атвелл (Нунатон)

Етакчиларга муносиб қаршилик кўрсатиши билан ажралиб турадиган "Сток Сити" бугун "Халл Сити"ни меҳмон қилади. Лекин, мезбонлар чемпионатда бешта учрашувдан бери ғалаба қозона олишмаяпти. Мана шундай қийин ҳолатдан чиқиб кетиш учун "Халл" жуда яхши рақиб. Сабаби, "йўлбарслар" сафарда ёмон натижа қайд этишмоқда.

Қизиқ:

- "Сток Сити" Премьер-лига доирасида "Халл Сити"га қарши охирги тўққизта ўйиндан фақат биттасини ютқазган;
- "Халл" Марко Силва бош мураббий бўлгач, АПЛда 17 очко жамғарди. Лекин, улардан атиги 1 очкосини сафарда олган.



"Сандерленд" – "Вест Хэм"
15.04.2017, 19:00
"Стадиум оф Лайт"
Бош ҳакам: Андре Марринер (Бирмингем)

"Сандерленд" катта эҳтимол билан мавсум якунида Чемпионшипга равона бўлади. Жамоа ўйин жиҳатидан ҳам ҳеч нарса кўрсата олмаяпти. Камига, бутун мавсум давомида жароҳатлар Мойесни қийнаб келаяпти. "Вест Хэм" эса мана шундай рақиблар билан беллашувларда очко қўлга киритиши керак. Акс ҳолда, кейинги мавсум Биличнинг ўрнини бошқа мутахассис эгаллаши мумкин.

Қизиқ:

- "Вест Хэм" Премьер-лигада "Сандерленд"га қарши охирги еттита ўйинда мағлуб бўлмаган (4 ғалаба, 3 дуранг);
- "Болғаурарлар" 2008/2009 йилги мавсумдан бери илк бор "Сандерленд"ни икки бор таслим этишлари мумкин.



"Уотфорд" – "Суонси"
15.04.2017, 19:00
"Викариж Роуд"
Бош ҳакам: Ли Мэйсон (Болтон)

"Уотфорд" чемпионатда қолиш масаласини деярли ҳал қилиб бўлган, Маццари шогирдлари ҳотиржам ҳаракат қилишади. Трой Дини етакчилигидаги жамоа бугун фаворит. "Суонси"га эса ғалаба жуда зарур, чунки жамоа айни пайтда хавфли ҳудудда турибди. Лекин, Клемент шогирдлари ҳозир яхши формада эмас.

Қизиқ:

- Бу "Уотфорд" ва "Суонси" учун Премьер-лигада ўзаро тўртинчи тўқнашув бўлади. Ҳозирча тенглик - икки клубда биттадан ғалаба ва битта дуранг;
- Трой Дини АПЛда асосий таркибда майдонга тушган охирги саккизта ўйинда олтита гол урган.



"Саутгемптон" – "Манчестер Сити"
15.04.2017, 21:30
"Сент-Мэрис"
Бош ҳакам: Нил Суорбрик (Ланкашир)

"Саутгемптон" ўтган турда "Вест Бромвич"ни мағлуб этди ва уларга яқинлашиб олди. "Авлиёлар" мавсум давомида бир маромни ушлаб тура олишмаяпти. Ушбу ўйинга мезбонлар ҳужумчиси Маноло Габбьядини тикланиши мумкин, лекин бу аниқ эмас. Агар футболчи майдонга туша олса, бу мезбонларга қўшимча куч бериши мумкин.

"Манчестер Сити" олдинги турда тўрт ўйинлик ғалабасиз сериясига барҳам берди. Бугун улар фаворит ҳисобланишади. Агуэро, Сане, Стерлинг, Де Брюйне ва Силвалардан иборат ҳужум чизиғи исталган жамоа ҳимоясини пароканда қилиши мумкин.

Қизиқ:

- "Саутгемптон" жамоаси "Манчестер Сити"га қарши сўнгги еттита ўйиндан фақат биттасини ютган (1 ғалаба, 2 дуранг, 4 мағлубият);
- Серхио Агуэро "авлиёлар" дарвозасини ишғол қилиш учун 264 дақиқа сарфлаган, бундан ёмонроқ кўрсатгич фақат "Эвертон"га қарши қайд этилган (312 дақиқа);
- Агуэро Премьер-лигада апрель ойида ўтказилган охирги 11та ўйиннинг барчасида гол урган (14та).



"Вест Бромвич" – "Ливерпуль"
16.04.2017, 17:30
"Хауторнс"
Бош ҳакам: Жонатан Мосс (Йоркшир)

"Вест Бромвич" уйда қувноқ жамоа. "Ливерпуль"дек ҳужумкорликни яхши кўрадиган клубга қарши қизиқ ўйин бўлиши шубҳасиз. Тони Пьюлис жамоаси етакчиларга қарши яхши ўйнасада, кўп ютқазади.

"Ливерпуль" таркибида Садио Мане мавсум охиригача сафдан чиқди. Лекин, Фирмино бу турда майдонга тушиши мумкин. Клопп жамоаси буёғига фақат ғалаба қозониши керак. Акс ҳолда, Чемпионлар лигасига йўлланма берувчи ўринлардан қуруқ қолиши ҳам мумкин.

Қизиқ:

- "Ливерпуль" жамоаси "Хауторнс" стадионида 2011 йилнинг октябридан бери ғалаба қозона олмаган;
- "Вест Бромвич" бу мавсум Премьер-лигада бурчак зарбасидан кейин энг кўп гол урган (14та);
- Коутиньо АПЛда кетма-кет учта ўйиндан бери гол ураяпти. Агар бразилиялик эртага ҳам муваффақият қозонса, тарихда биринчи бор кетма-кет тўртта баҳсда гол урган бўлади.



"Манчестер Юнайтед" – "Челси"
16.04.2017, 20:00
"Олд Траффорд"
Бош ҳакам: Роберт Мэдли (Йоркшир)


"Мидлсбро" – "Арсенал"
17.04.2017, 23:59
"Риверсайд"
Бош ҳакам: Энтони Тейлор (Манчестер)

"Мидлсбро" бу мавсум энг кам гол ўтказиб юборган жамоалардан бири, лекин клуб Чемпионшипга тушиб кетиш арафасида турибди. Чунки, ҳужумдаги ишлар жуда ёмон.

"Арсенал" эса ҳали ҳам алаҳсираб юрибди. Венгер билан боғлиқ флешмоблар эса бутун дунёда кенг кўлам ёзди. Шунга қарамай, Ўзил, Уолкотт, Санчес каби ижрочиларга эга бўлган "тўпчилар" бу тўқнашувда фаворит ҳисобланишади.

Қизиқ:

- "Мидлсбро" Премьер-лигада "Арсенал"га қарши охирги тўртта уй учрашувида мағлуб бўлмаган (2 ғалаба, 2 дуранг);
- "Мидлсбро" АПЛда айнан "Арсенал"да энг кўп гол ўтказиб юборган (29та ўйинда 62та гол).




Англия Премьер-лигаси турнир жадвали >>> АПЛ


Толибжон Қосимов