Андрей Фёдоров - Жароҳатлар, янги ҳужумчи, Ҳамза Каримов ва Туркия йиғини ҳақида

"Тўғри бугун назорат учрашуви эди, бироқ барибир бундай ўйнаб бўлмайди. Футболчилар кўп хато қилишди. "Бухоро" билан ўйинда ҳам деярли шундай бўлганди. Ўшанда рақиб вазиятлардан фойдаланмаганди, бугун эса акси бўлди. Футболчилар ўйин кунлари ҳам тонгги машғулотларда иштирок этишмоқда. Яъни жисмоний юкламалар жуда катта бўлмоқда. Буни барча олдиндан яхши биларди", - дейди Фёдоров. 

- Бугун ҳужумда нега биргина Никита Павленко ўйнади?
- Сабаби жароҳатлар билан боғлиқ. Мурод Бобожонов ўтган баҳсда 10 дақиқа ўйнаб жароҳат олганди. Шерзод Ҳакимов ҳам оёғини қайириб олди. Сунъий майдон бўлгани учун футболчиларда шикастланишлар бўлмоқда. Янги мавсум олдидан сафимизга яхши ҳужумчи қўшиб олиш режамиздан ўрин олган. Ҳозир ҳужумчи қидираяпмиз.

- Ҳамза Каримов борасидаги фикрларингиз қандай?
- Тажрибали эканлиги кўриниб турибди. Бироқ жароҳат туфайли ўтган йил 4та ўйиндагина майдонга тушди. Шу боис машғулотлар ҳамда мана шундай назорат ўйинларида ўзини кўрсатиши керак.

- Кейинги режалар билан ўртоқлашсангиз.
- Тошкентдаги бу йиғинимиз тугагач Фарғонада Ҳоким кубоги мусобақасида иштирок этамиз. Шундан сўнг балки Туркияда йиғин ўтказишимиз мумкин. Ҳозир ҳужжат ишлари давом этмоқда, - дейди "Нефтчи" устози. 

Нарзулла Сайдуллаев