Аллегри ўрни ҳозирча хавфсиз, аммо "Ювентус" Зидан ва Конте ҳақида ўйламоқда

Турин клуби раҳбарияти А Сериядаги решқадами "Наполи"га йирик 1:5 ҳисобида мағлуб бўлгани учун жамоа устозидан ранжиганга ўхшайди. "Бьянконери" Диего Армандо Марадона номидаги ўйингоҳда сўнгги ўттиз йилликдаги энг ёмон мағлубиятлардан бирини қабул қилиб олди. Бу эса ўша ўйин мезбонларига ушбу мавсумда ким чемпион бўлиши ҳақида хабар йўллаш имконини берди. Неаполь клуби айни пайтда "Юве"дан 10 очко кўпроқ жамғарган ҳолда чемпионат турнир жадвалида ҳукмронлигини давом эттирмоқда. Улар 30 йилдан ортиқ вақтдан кейин илк бор Скудетто томон ҳаммадан тез одимламоқда.

Клуб раҳбарлари йирик мағлубиятда Аллегрини бош айбдор деб билса-да, унинг кетма-кет 8 та ўйинда шогирдларини ғалаба томон етаклаганини қадрлайди ва чемпионатнинг бу босқичида уни ишдан бўшатиш ҳақида ўйламаяпти.

Айни паллада клубнинг келажакдаги режалари муҳокама қилинмоқда ва Аллегрининг 2025 йилгача йиллик 7,5 млн евро ишлаб топишини белгиловчи битими уни ҳимоя қиладиган нарса бўлиб турибди.

Шунга қарамай, "Ювентус" ҳали ҳам Зинедин Зидан ва Антонио Контедан бирини ёзда тайинлаш ғоясини жиддий ўйлаб кўрмоқда. Бироқ асосий муаммо бу ғоя билан боғлиқ харажатлардир. Аллегрини ишдан бўшатиш ва иккита элита мураббийлардан бирини олиб келиш 60-90 млн еврога тушади. Бу ҳозирда молиявий масалалар бўйича тергов қилинаётган клуб учун катта маблағ.