43 ёшга тўлган "Сариқ иблис" ҳақида

Футболчилар доимо эътибор марказида бўлишга, соврин ютадиган жамоаларда ўйнашга интиладилар.

Ўз ҳаётини биргина клубга бағишлаган футболчилар доимо ҳурматлилар қаторида эътироф этилади. Бундан инсонлар учун тренд, шуҳрат, обрў-эътибор деган нарсалар катта аҳамият касб этмайди. Уларнинг асосий кучи виждонда. Улар виждонга ва юракларига қулоқ соладилар. Мана шундай футболчилар борки, футболда садоқат, содиқлик каби сўзлардан фойдаланамиз.

Пол Скоулз биз юқорида санаб ўтган инсонлар сирасига киради. У ўзининг содиқлиги, истеъдоди, ақли ва инсонийлик сифатлари билан барчага намуна бўла олади. Унинг номи "Манчестер Юнайтед" тарихига зарҳал ҳарфлар билан битилган.

"Агар чиқиш йўлакчасида журналистлар турган бўлсалар, мен биринчи чиқиш ва интервью бериш имкониятини Девид Бекхэмга бераман. Бу нарса унга ярашади. Мен эса бундай вазиятларни унчалик ҳам хушламайман" - деганди қачонлардир Скоулз. "Хеч кимга сездирмасдан машинамга ўтириб олишни ва уйга тезроқ етиб олишни маъқул кўраман. Тушунмайман, микрофон кўтариб юрган бу одамлар мендан нима истайдилар? Кимлардир мен ҳақимда мақолалар тўплайди. Мен шунчаки газеталарни кўриб чиқаман ва кейин уларни ахлат қутисига ташлаб юбораманку".

У ўз вақтида футболчилик фаолиятини умуман бошламаслиги ҳам мумкин эди. Бунга учта сабабни кўрсатиш мумкин:

-Пол крикетнинг ашаддий ишқибози ҳисобланади. Шундай гап эшитганмиз: Скоулз футболни мактабдаги ўқитувчисининг талаби билан танлаган. Кейин ўша ўқитувчи учун "Манчестер Юнайтед" академиясига олиб борган

-Астма. Бу касаллик профессионал спортчи бўлишга жуда катта ҳалал беради. Аҳир спортчи исталган вақтда нафас сиқиб қолишдан азият чекиши мумкин.

-Осгуд-Шлаттер касаллиги (10-18 ёшли болаларда тиззаси билан боғлиқ муаммолар бўлиши). Жисмоний юкламалар тиззада қаттиқ оғриқ келтириб чиқариши мумкин бўларди.

Фаолияти бошидаёқ у кўз нури билан боғлиқ муаммоларга дуч келган. Лекин, унга футболдан бошқа хеч нарса қизиқ эмасди. Шунинг учун, Пол севимли машғулоти йўлида соғлиғи билан боғлиқ муаммоларга эътибор бермасди.

Пол Скоулз - афсонавий "Класс 92" битирувчиси ҳисобланади. "Класс 92" дунё футболида ўзига ҳос обрўга эга. Катта эҳтимол билан бошқа бунақаси бўлмайди. Академия клубидаги битта йилда битирган футболчилар дунё миқёсидаги футболчи бўлиб етишиши умуман кузатилмаган ҳолат. Бир эмас, икки эмас... КЎП! Райан Гиггз, Ники Батт, Фил ва Гари Невиллар, Девид Бекхэм ва албатта Пол Скоулзлар "Класс 92" сўзидан олдин "афсонавий" деган сўз ҳам қўшиб айтилишига сабабчи бўлганлар. Қойил!

Яна бир қизиқ факт. 1996 йилда "Манчестер Юнайтед" "Блэкберн"дан Алан Ширерни ўз сафига қўшиб олишга кўп уринганди. "Роверс" раҳбарияти ўшанда фақатгина битта шарт билан Аланни манчестерликлар сафига қўйиб юборишга рози бўлганди: Скоулз "Блэкберг" футболчисига айланиши лозим эди. Лекин, сэр Алекс бундан "бартер"га рози бўлмаган.

Айтганча, Пол фаолиятини марказий ҳужумчи ролида бошлаганини кўпчилик билмаса керак. Тўғри, бунга ишониш қийин, лекин сэр Алекс қаҳрамонимизни айнан ўша нуқтада ўйнатишга қарор қилганди. Унинг асосий вазифаси рақиб дарвозасига голлар киритиш эди. Аммо, Рой Киннинг жароҳати сабаб Фергюсон уни марказга ўтказади. Энди бўйи унча баланд бўлмаган йигитча гол киритишга эмас, ўзининг заргарона тўп узатишлари билан мухлисларни хурсанд қилиши лозим эди.

МЮнинг энг яхши футболчиси ким? Бу қийин савол. МЮ сафида ўз ишининг ҳақиқий усталари бор. Руни, Нани... Яна уларда ажойиб ҳимоя бор. Аммо, бунгача ўтказилган ўйинлардан келиб чиқадиган бўлсак мен Пол Скоулз ва Райан Гиггзларни алоҳида кўрсатиб ўтган бўлардим. Улар алоҳида эътироф этиш лозим бўлган футболчилар. 

"Барселона" футболчиси Андрес Иньеста. 2011 йил. ЕЧЛ финали олдидан

Скоулзга клуб билан ютиш мумкин бўлган совринлар борасида омад кулиб боққан. Аммо, терма жамоада бунинг акси. Терма жамоадаги шерикларда бир қарасанг Бекхэм Симеонега қарши қўпол ҳаракат қилиб майдондан четлатилади, бир қарасанг Девид Симэн 40 метрдан Роналдиньонинг жарима зарбасидан гол ўтказиб юборади.

Шунинг учун ҳам Евро-2004дан сўнг Пол терма жамоадан кетиши ҳақида эълон қилган. Ундан ташқари Свен Йоран Эрикссон ёшроқ бўлган Фрэнк Лэмпард ва Стивен Жеррардларга ишонч билдира бошлаганди.

"Терма жамоадан кетиш истаги оиламга яқин бўлиш билан боғлик. Менга хеч қачон уйдан узоқда ўйнаш ёқмаган. Англия қандайдир йирик турнирда қатнашса 3-4 кун ўзимни яхши ҳис қилардим. Кейин эса рафиқам ва болаларим йўқлиги сабаб ўзимга кела олмай қолардим. Кетиш қарорини ўзим қабул қилганман. Кейин эса уни сер Алекс Фергюсонгга айтганман. Свен Йоран Эрикссон эса машғулотлар вақтида мени "ақлдан озган"га чиқариб қўйган. Шундан сўнг елкамдан тоғ ағдарилганди. Тўғри қарорга келгандим. ЖЧ-2010 олдидан мураббийлар штаби мени яна терма жамоага чақирганди. Узоқ ўйладим. Лекин, қароримни ўзгартирмадим. Ундан ташқари, ЖАРдаги Мундиал йўлланмасини қўлга киритган йигитлар олдида менга ноқулай эди", - дея ўша қарорига изоҳ берган Скоулз ўз китобида.

2011 йилда эса у футболчилик фаолиятини якунлашини эълон қилди. Бутсаларини михга илган бўлсада у МЮга ёрдам беришда даврм этди. Скоулз "Юнайтед" академияси мураббийи сифатида иш бошлаганди.

Аммо, 2012 йилнинг 8 январида жароҳатлар эпидемияси сабаб сэр Алекс ўзининг собиқ аскарини ёрдамга чорлади. Принципиал рақиб - "Манчестер Сити"га қарши кубок ўйинида у захирадан майдонга тушиб жамоасига ёрдам берди. Ўшандан сўнг ярим йил давомида у ажойиб ўйинлар намойиш этди. "Олд Траффорд" эса ўз қаҳрамонини доимо олқишлаб турарди.

Ниҳоят 2013 йилнинг май ойида у футболдан кетди.

Кейинчалик Пол Скоулз дўстлари билан бирга Манчестернинг жанубида жойлашган "Сэлфорд Сити" клубини харид қилади. Шуни алоҳида таъкидлаб ўтиш лозимки, айнан шу ерда Пол Скоулз таваллуд топган. Гиггзлар оиласи фарзандини футболчи бўлиши учун айнан шу ерга кўчиб келганлар. Айнан шу ерда Гари Невилл кўзга ташланган. Клуб нафақат Манчестерда футболни оммалаштириш мақсадида, балки болалик йилларини ёдга олиш учун ҳам сотиб олинганди. Бу қизиқарли тижорий лойиҳа бўлиб, уни сотиб олган йигитлар ўз машҳурликлари ва тажрибалари эвазига клубни танитмоқчилар. Ким билади, балки қачондир Манчестерда учинчи суперклуб ташкил топар?

Пол - беназир. Унда хеч қачон агент бўлмаган. "Манчестер" ва Скоулз бир-бирларига доим ишонганлар. Шунинг учун, уларнинг ўртасида кимдир туриши шарт бўлмаган.

Шунақа гаплар. Туғилган кун муборак бўлсин "Сариқ иблис"!

sports.ru сайти асосида Азиз Тўхтамуродов тайёрлади