ЖЧ-2014. ПРЕВЬЮ. Аргентина – Босния ва Герцеговина

Жанубий Американинг кучли  жамоаларидан бири Аргентина Босния ва Герцеговинага қарши баҳс олиб боради. Ўйин ҳашаматли “Маракана” стадионида бўлиб ўтади.

ЖЧ-2014. “Е” гуруҳи. 1-тур
Аргентина – Босния ва Герцеговина
Бош ҳакам: Жоэль Агилар (Сальвадор)

Тахминий таркиблар
Аргентина: Ромеро — Сабалета, Гарай, Фернандес, Рохо — Гаго, Маскерано, Ди Мария — Агуэро, Месси, Лавесси.
Босния: Бегович — Муйжа, Шунич, Спахич, Колашинац — Хайрович, Бешич, Пьянич, Лулич — Мисимович — Жеко
Жароҳат олганлар: Паласио, Игуаин — Салихович



Босния ва Герцеговина миллий терма жамоаси ўз тарихида биринчи бор жаҳон чемпионатида иштирок этяпти. Шу боис кўпчилик учун бу жамоа сирли жумбоқ бўлиб кўринмоқда. Аргентина эса гуруҳнинг яққол фаворити ҳисобланади. Эрон ва Нигерияга нисбатан Босния бирмунча кучсиз кўринмоқда.



Болқонликлар илк учрашувни нафақат гуруҳ фаворити, балки мусобақада ғолиб чиқишга даъвогарлик қилувчи жамоага қарши ўтказишади. Албатта, учрашувда дуранг қайд этилгудек бўлса, бу натижа Босния учун жуда ажойиб бўлади. Аргентина термаси устози Алехандро Сабелья айрим сабабларга кўра, Карлос Тевесни мундиалга олиб кетмади. Гонсало Игуаин билан Родриго Паласио эса жароҳат туфайли дастлабки баҳсни ўтказиб юбориши мумкин. Шундай экан, ҳозирча Аргентина термаси ихтиёрида Агуэро, Месси, Лавесси, Альварес каби футболчилар бор. Лекин бу номлар билан ҳам рақибга жиддий ташвиш туғдирса бўлади.



Боснияда эса таркиб бўйича деярли муаммо йўқ ҳисоби. Жозе Моуриньонинг версиясига кўра Англия премьер-лигасининг энг кучли футболчиси Эдин Жеко сафда экан, аргентиналик ҳимоячиларга осон бўлмайди. Қолаверса, Жекони ҳужумда Мисимович, Пьянич каби футболчилар қўллаб туришади.

Аргентинанинг энг ожиз нуқтаси деб ҳимояни кўрсатсак бўлади. Лекин жамоа қайд этган натижалар бунинг тескарисини айтиб турибди. ЖЧдан олдин ўтказилган бешта ўртоқлик учрашувида Аргентина бирорта ҳам гол ўтказиб юбормади.



Алехандро Сабелья (Аргентина бош мураббийи):
“Агар биз хатога йўлқ қўйиб мағлубиятга учрасак, бунда бош мураббий айбдор бўлади. Шундай экан, мен ғалаба қозонишни сўраб қоламан. Ким жаҳон чемпиони бўлишини айтиб беролмайман. Мен учун кимнидир фаворит дейишдан маъно йўқ”.



Сафет Сушич (Босния бош мураббийи):
“Биз учун энг катта хавф Мессининг майдонга тушиши. Унинг учун алоҳида бир ҳимоячини бириктириб қўйишдан маъно йўқ. Шундай экан, тўп унга келиши биланоқ кимдир ёнида бўлиши керак”.

Лионель Месси:
“Аввалги жаҳон чемпионатларида ўйиним қовушмаганини тан оламан. Бу гал ўша хатоларни такрорламайман. Мақсадим битта: жаҳон чемпиони бўлиб уйга қайтиш. Финалда Неймарга қарши тўп суришни истайман”.



Қизиқарли фактлар
Аргентина шу пайтгача Босния билан икки марта ўйнаб, иккаласида ҳам ғалаба қозонган. Охирги беллашувда Аргентина 2:0 ҳисобида зафар қучган, Агуэро иккита гол урган.
Аргентина ЖЧ-2014 иштирокчилари орасида энг “қари” таркибга эга: жамоанинг ўртача ёши 29.
Аргентина сафида ёши 24дан кичик бўлган ўйинчи йўқ.

Х.Холиқов тайёрлади.