Йоахим Лёв: "Бу тўқнашув ғолиби чемпионликка асосий даъвогарга айланади"

- Италиянинг кўплаб ўйинларини томоша қилдик, чуқур ўргандик. Италия нафақат ҳимояда, балки ҳужумда ҳам кучли жамоа. Улар олдинги чизиқда бир қатор қизиқарли вариантларни қўллашади. Лекин уларнинг энг кучли тарафи - ҳимоя. Италия рақибни ўз жарима майдончаси олдида зарарсизлантиришда анча уста. Биз ҳам уларнинг бу ўйинларига қараб, рақибнинг ҳимоядаги ўйинларини таҳлил қилиб, шунга яраша тараддуд кўрдик.

Италия билан бўладиган баҳсда юзага келадиган ҳар бир вазиятдан унумли фойдаланмоқ лозим. Чунки "Скуадра Адзурра"га қарши ўйинда сенда бошқа имконият туғилмаслиги мумкин.

Бу тўқнашув ғолиби чемпионлик учун асосий даъвогарга айланади. Ярим финалга йўл оладиган ҳар бир жамоа чемпион ҳақида ўйлай бошлайди ва мақсадни юқори қўяди.

Германия чемпион бўлиши учун етарли имкониятларга эга, футболчиларимизнинг салоҳияти ҳам бунга етади. Аммо ҳали йўл узоқ. Италиядан ўтган тақдиримизда ҳам қолган йўл осон кечмаслиги аниқ. Чунки бу тўқнашув ғолиби ярим финалда мезбонлар билан учрашиши мумкин. Германия ва Италия учрашуви ғолибини чемпионликка асосий фаворит, дея ҳисоблаётганларнинг фикрига қўшиламан.

Биз ўз кучимизга ишонамиз. Сабаби, ўзимизнинг сифатли, кучли тарафларимизни яхши биламиз. Лекин рақиб кимлигини ҳам унутмаслик лозим. Де Росси ҳақида эшитдим. Менимча, Де Росси бизга қарши ўйинда иштирок этолмаса керак. Аммо Италияда бу каби муаммоларни ёпиш учун доимо вариантлар бўлган ва чиқади.