"Янгиер" бош мураббийи Диёр Мирзабоев: "Ақлга сиғмайди, қандай қилиб 5 та ҳимоячи билан 3 та гол ўтказиб юбориш мумкин? Сабабини жиддий суриштирамиз"

Ўйин ҳақида

- Ҳимоядаги хатолар эвазига голлар ўтказиб юбордик. Жамоанинг барча футболчиларига бугунги ўйин учун эътирозим бор. Биринчи бўлим ва иккинчи бўлим бир-биридан фарқ қилди. Иккинчи бўлимда захирадан қўшилган футболчилар ўйинни кучайтирв олишди деб ўйлайман. Бизда ҳам голли вазиятлар бўлди, бироқ фойдалана олмадик.

Ўйинга жамоани мен тайёрлаганман. Бундан келиб чиқади-ки, мен ўз ғояларимга футболчиларга етказиб бера олмаганман. Вазият шу кўринишда бўлса, уларнинг ўйинга бўлган муносабати туфайли узоққа бора олмаслигимиз ойдинлашмоқда. "Хоразм" жамоасини ғалаба билан табриклайман.

- Биринчи ва иккинчи бўлимлар бир-биридан фарқ қилиши сизнинг ўйинга тайёрлаган тактик услубингиз эдими? Таркиб тандашда хатоликка йўл қўйдим деб ўйлайсизми?

- Йўқ, таркиб танлашда хатоликка йўл қўйдим деб ўйламайман. Балки ўйинга тайёрлаган услубим хато бўлгандир. Бугун 5 та ҳимоячи билан ўйнадик, бундан кўзланган мақсадимиз гол ўтказмаслик эди. Ақлга сиғмайди, қандай қилиб 5 та ҳимоячи билан 3 та гол ўтказиб юбориш мумкин? Албатта, буни жиддий суриштириб тагига етамиз.

Захирадан майдонга чиққан футболчиларга миннатдорчилик билдираман. Улар майдонга тушиб қўлларидан келганича ҳаракат қилишди.

- Жамоанинг олдига қандай мақсад қўйилган?

- "Янгиер"ни қабул қилиб олганимда 3 очко билан қуйи ўринларда юрганди. Раҳбарият бизга кучли бешликка кириш вазифасини қўйди. Шунга ҳаракат қилаяпмиз, кетма-кет ўйинларда очколарни қўлга киритдик. Ҳали олдинда 2 ўйинимиз бор ва ушбу имкониятлардан максимал равишда фойдаланишга ҳаракат қиламиз.