Ла Лиганинг 33-туридан ўрин олган "Алавес"га қарши баҳс (2:1) бошида "Сантьяго Бернабеу" мухлислари Винисиус ва Килиан Мбаппени ҳуштаклар билан кутиб олишди. Винисиус учрашувда ғалаба голини киритгач, мухлислардан узр сўраб, клуб эмблемасини ўпиб қўйган бўлса-да, бу ҳаракатлар ҳаммани ҳам ишонтира олмади.
"Мен "Реал" учун энг яхши ечим — ушбу футболчини сотиш эканлигига қатъий ишонаман. Чунки Хаби Алонсо давридаги "Барселона" билан ўйин куни у кийиниш хонасида ички бўлиниш келтириб чиқарди, ҳокимиятни ўз қўлига олди ва ҳеч ким уни тўхтатиб қолмади.
Бугунги ишоралари — унинг хатоларини тан олиш усули, холос. Лекин менимча, у барча имкониятларидан фойдаланиб бўлди. "Мадрид" уни фақат яхши ўйини учун жамоада олиб қолган эди — бу клуб унинг хулқ-атвори учун тўлаган товон пули эди.
У яхши ўйнаган вақтда баъзи ишлари кечирилган бўлиши мумкин, аммо ишлар юришмай қолганда, унинг салбий хулқ-атвори ҳамма нарсадан устун кела бошлади. Омадсиз мавсумлардан сўнг қатъий чоралар кўриш вақти келди", — деди Санс.
