Вадим Абрамов: "Ўйин 0:2 ҳисобида бизнинг мағлубият билан бошлангандек таасурот уйғотди"

Ўйин ҳақида

- Голларга ва хатоларга бой учрашувга гувоҳ бўлдик. Ўйин худди бизнинг 0:2 ҳисобидаги мағлубиятимиз билан бошлангандек таасурот қолдирди. Рақибнинг иккинчи голидан сўнг йигитлар ўзларига келиб олишди. Танаффусда йигитларга шу ҳақида тушунтирдим. Мағлубиятдан чиқиб кетишга интилдик, ҳисобни тенглаштирдик ҳам. Бироқ давомида яна 2 та тўп ўтказиб юбориб, мағлуб бўлдик.

- Мухлислар жамоа дарвозабони Равшан Ягудин кўрсатган ўйиндан норози эканини билдиришди. Буни қандай изохлаган бўлардингиз?

- Албатта, сиз битта ўйинда 4 та гол ўтказиб юборсангиз, сиздан ҳеч ким рози бўлмайди. Эътирозлар бўлиши табиий ҳол. Чиндан ҳам 4-голда дарвозабоннинг яққол хатоси кўринди.

- Биринчи бўлимда рақибнинг 2 та голи режаларингизга қандай таъсир кўрсатди?

- Ўйинни 0:2 ҳисобидаги мағлубият билан бошлаш режаси ҳеч кимда бўлмайди. Мезбонлар бизнинг футболчилар ўйинга мослашиб олгунича 2 та гол уришди. Бу ҳақида юқорида ҳам айтиб ўтдим. Биринчи давра тугади, олдиндаги фурсат давомида натижалар, хато ва камчиликларни таҳлил қилиб оламиз.