Тимур Кападзе: "Олтинчи ўрин "Олимпик" учун катта ютуқ. Муҳими футболчилар ўсишга эришди"

Тимур Кападзе бу мавсум Ўзбекистон олимпия терма жамоаси билан U-23 Осиё кубоги финалига қадар етиб борди. Унинг шогирдлари турнирда ажойиб ўйинлари билан стадионга мухлисларни қайтарди. Шунингдек "Олимпик" билан илк бор Суперлигада иштирок этди ва ёш футболчилар билан мавсумни 6-ўринда якунлади. 

"Мазкур совринни олганимдан хурсандман. Бунда нафақат мени, раҳбариятдан тортиб, маъумурлар, шифокорлар умуман ҳамманинг ҳиссаси бор. Бутун жамоам йил давомида ҳаракат қилди. Осон бўлгани йўқ. Анча меҳнат қилдик. Шуларнинг самараси. Ўйлайманки, ушбу мукофот мени янада кучли қилади. Келажакда олдимизга қўйилган мақсадларга эришиш учун ажойиб мотивация ва куч бағишлайди. 

Ўйлайманки, олтинчи ўрин биз учун катта ютуқ. Муҳими йигитлар ўсишга эришди. Яхши даражага чиқишди. Суперлигада ҳар бир ўйинда керакли тажрибани олдик. Янги мавсумда бундан ҳам кучлироқ ҳаракат қиламиз",- дейди Тимур Кападзе.