Тимур Кападзе: "Малига қарши ўйин биз учун ҳар тарафлама фойдали бўлди"

– Учрашув ҳақида фикрингиз?

– Малини имкониятларини кўриш варианти бор эди. Биринчи ўйинни ўйнадик. Бу жамоа ҳақида маълумот йиғиш бироз қийин бўлди. Фақат Япония билан ўйнашган экан. Кучи ва имкониятлари кўриниб турибди. Бугунги ўйин биз учун қизиқ бўлди. Йигитлар яхши ҳаракат қилишди. Бу ўйин ҳар тарафлама биз учун фойдали бўлди. Осиё жамоаларини яхши биламиз. Европа ва Африка жамоаларини эса унчалик ҳам яхши билмаймиз. Бугунги ўйин қаерда камчилигимиз ва устун жиҳатларимиз борлигини кўрдик. Африка жамоалари доим жисмонан кучли бўлган. Бу ўйинда бизнинг кучли жиҳатларимиз ҳам кўриниб турибди. Олимпия ўйинларида бундай рақиблар дуч келиши аниқ.

– Бугунги ўйинда ВАР бўлиши кимнинг ташаббуси?

– Биз ҳам бугун билдик. Тизим яхши ишлади. ВАР аралашган биргина вазият бўлди. Булар барибир иккинчи даражали нарсалар. Асосийси, бугун деярли барча футболчиларга имконият бердим. Захирадагиларни ҳам кўришни истадим. Бизда бор ўйинчилар майдонга тушишди, улар ўзларини кўрсатишга ҳаракат қилишди.

– 15 июль куни Европа вакилига қарши ўйнаймизми?

– Менимча, йўқ. Бўлажак рақиб лотин Америкасидан бўлиши кутилмоқда. Буни вақт кўрсатади. Ўйиндан мухлислар ҳам яхши таассурот олишди деб ўйлайман. Камчиликлар бўлди, умуман олганда яхши ҳаракат қилдик.