Терма жамоанинг бугунги кунидан хабарлар...

Афсуски, таркибда йўқотиш мавжуд. Сурия билан ўйиннинг иккинчи бўлимида Жавоҳир Соҳибовга алмаштирилган Азиз Ҳайдаровнинг жароҳати жиддий бўлиб чиқди. Шу сабаб у Қатарда бўлиб ўтадиган ўйинда иштирок эта олмайди. Бугунги машғулотларда Виталий Денисов ҳам қатнашмади. Виталикнинг аввалги жароҳати безовта қилган аммо уники Ҳайдаровчалик жиддий эмас.

Сурия билан баҳсда Одил Аҳмедов ҳам оғриқ қолдирувчи укол ёрдамида майдонга тушган эди. Одил сўнгги бир ойни "Краснодар" сафида ҳам жароҳати билан ўтказяпти. Шу боисдан Олег Кононов унинг хизматларидан 100%да фойдалана олмаяпти. 

Юқоридаги уч футболчимизга соғлиқ тилаймиз!

Машғулот соат 17:00га белгиланди. Боиси, Қатардаги ўйинни ҚФА соат 19:00га белгилаган. Бу вақтда мамлакатдаги ҳаво ҳарорати тахминан 32-35 даража иссиқ бўлади. Самвел Бабаян футболчиларни ўйин вақтидаги ҳавога кўникиш ҳосил қилиши учун машғулот вақтини анча эртароққа белгилади. 

Терма жамоамиз футболчилари аввалига 10 дақиқа давомида стадион бўйлаб югуриш машғулотини ўтказдилар. Шундан кейин барча стадион залида чигал ёзди машқларини бажардилар. Сурия терма жамоасига қарши учрашувда майдонга чиққан футболчиларга жавоб берилгач, қолган ўйинчиларимиз тўлақонли машқ ўтказдилар.

Эртага МТЖ тўлиқ таркибда машқ қилади ва 4 сентябрь куни тонгда, чартер рейсда, Тошкент - Доҳа йўналиши билан Қатар пойтахтига учиб кетадилар. У ерда вакилларимиз ЖЧ-2018 саралаш баҳси доирасида Қатар терма жамоасига қарши майдонга тушадилар.

Нодирхўжа Юлдашев.