"Спортинг" "Интер" клубини 30 млн еврони тўлашдан бўйин товлаганликда айблади
14 июл 2021 00:38
Янгиликлар

"Спортинг" "Интер" клубини 30 млн еврони тўлашдан бўйин товлаганликда айблади

"Спортинг" клуби Жоау Мариунинг "Бенфика" клубига ўтиши борасида "Интер" клубига катта айблов билан чиқди.

Гап шундаки, 2016 йилги шартномада, агарда, "Интер" клуби ушбу футболчини бошқа португал клубига сотиб юборадиган бўлса, 30 миллион евро миқдоридаги пулни "Спортинг" клубига тўлаши лозим эди. Аммо, яқиндагина "Интер" клуби Жоау Мариу билан шартномасини бекор қилди. Футболчи эса "Бенфика" клубига эркин агент сифатида келиб қўшилди.

"Спортинг" клуби "Интер" футболчини 2016 йил имзоланган шартномадаги 30 миллион евролик бандни айланиб ўтиш учун сотмагани ва ўзаро келишиб олиб, шартномани бекор қилганликда айбламоқда.

"2016 йил Жоау Мариуни "Интер"га сотаётганимизда, шартномага агарда ушбу футболчи бошқа португал клубига ўтадиган бўлса, "Интер" 30 миллион евро миқдорида товон пули тўлаши ҳақидаги банд киритилганди. Улар 5 йил олдинги шартномадаги ушбу бандни айланиб ўтишга уринишди ва ўзаро шартномани бекор қилишди", -дейилади клуб баёнотида.

Эслатиб ўтамиз, Жоау Мариу 2016 йилда "Спортинг" сафидан "Интер"га трансфер қилинганди. Ўтган йили эса у "Спортинг"га қайтиб мавсумни ижарада ўтказганди.