“Сўғдиёна” – “Машъал” ўйини олдидан мураббийлар фикри

Тахминимизча, жуда қизиқарли баҳс кечиши кутилмоқда. Хўш, ўйин борасида ким қандай фикрда? “Футбол Экспресс” газетаси яқинда таниқли мураббийлар Баҳром Ҳакимов ва Зоир Тўрақуловга мурожаат қилиб, уларнинг ўйиндан олдинги фикрини билишга қизиқди.

Баҳром Ҳакимов: “Сўғдиёна”ни қишда айрим етакчи ўйинчилар тарк этишди. “Машъал” эса бу йилги ПФЛ Кубогини ютди. Кўпчилик, бу жамоа ҳақида илиқ фикрларни билдиряпти, лекин мен бир нарса дейишга қийналаман. Зоминдаги стадионнинг ҳозирги аҳволи қанақалигидан ҳам хабарим йўқ. Агар майдон ҳалиям тайёр бўлмаса, у ҳолда бу нарса “Сўғдиёна”га қўл келиши мумкин.

Зоир Тўрақулов: Билишимча, “Сўғдиёна” таркибини унчалик кучайтиргани йўқ. Жамоада молиявий муаммолар борлиги ҳақидаги гап-сўзлар ҳам қулоққа чалиняпти. “Машъал” эса биринчи лигадан яна олий лигага қайтди ва жамоа ўзини кўрсатишга ҳаракат қилиши турган гап. Менимча, бу ўйинда “Машъал” ғалаба қозонади.