“Реал” Рамос билан келиша олмаяпти

Футболчи жамоада қолиш ниятида, аммо клубдагилар футболчи билан унинг маоши борасида келиша олишмаяпти. “Реал” раҳбарияти клуб ходимлари ва футболчиларга пандемия муносабати билан ойлик иш ҳақини камайтириш борасида яна бир бор мурожаат қилмоқчи.

1 январдан бошлаб Рамос шартнома борасида бошқа жамоалар билан музокаралар ўтказиш ҳуқуқига эга. Ҳимоячи жамоани тарк этадиган бўлса, қироллик клуби унинг ўрнига Давид Алаба (“Бавария”) ёки Эрик Гарсия (“Манчестер Сити”)ни олиб келиши мумкин. Шунингдек, эҳтимолий трансферлар руйхатидан “Вильярреал” ҳимоячиси Пау Торрес ҳам жой олган.

Рамос 2005 йилдан буён “Реал” шарафини ҳимоя қилиб келади. Бунгача у “Севилья”да тўп тепган ва ушбу жамоа тарбияланувчиси ҳисобланади. 34 ёшли футболчи “қаймоқранглилар” билан 22 та соврин ютишга эришган. Улар орасида тўрт марта ЕЧЛ ва беш карра Испания чемпионлиги мавжуд. Футболчининг жамоа билан амалдаги шартномаси 2021 йилнинг ёзида ниҳоясига етади.