Qo'qondagi “Markaziy” o'yingohida bo'lib o'tgan tadbirda “Qo'qon spirt” AJ boshqaruv Kengashi raisi vazifasini bajaruvchisi I. Abdullaev , “Qo'qon-1912” klubi rahbariyati, murabbiylar shtabi, futbolchilar va bir qator muxlislar ishtrok etishdi.
Marosimni odatdagidek, “Qo'qon-1912” futbol klubi vice-prezidenti, bosh direktori Baxtiyorjon Tolipov ochdi.
– Bu yilgi mavsum jamoamiz uchun juma muvaffaqiyatli o'tmoqda, -deb so'z boshladi klub rahbari. – Birinchi davrani a'lo darajada o'tkazdik. Shuning uchun ikkinchi davra arafasida tarkibga ikki nafar futbolchi jalb etdik, xolos. Klubimizdan 4 nafar futbolchi ketgan bo'lsa, 2 nafar yangi o'yinchini oldik.
Jamoamizning oldidagi maqsadi Osiyo chempionlar ligasiga yo'llanma olish. O'ylaymanki, mavsum so'nggida o'z oldimizga qo'ygan vazifalarni bajara olamiz. Bunda albatta siz muxlislarning ko'magi ham kerak bo'ladi. “Qo'qon-1912”ning fidoiy muxlislari bisyor ekanligini bilaman. Sizlar jamoamizni yaxshi yomon kunlarida qo'llab-quvvatlab keldingizlar. Buning uchun barchangizga jamoamiz nomidan minnatdorchilik izhor etaman. Bugun ikkinchi davra arafasida o'z safimizga qo'shib olgan yangi futbolchilarni keng ommaga tanishtiramiz.
Shundan keyin mavsumning ikkinchi qismida jamoamiz sharafini himoya qiladigan yangi o'yinchilarga ikkinchi davrada qaysi raqamlardagi futbol liboslarida o'ynashlarini ommaga taqdim etildi. Unga ko'ra, Quvondiq Ro'ziev 70, Doniyor Hasanov 14-raqamlarda maydonga tushishlari oydinlashdi.
Tadbirda shuningdek, jamoamiz bosh murabbiyi No'mon Hasanov ham so'zga chiqib, qo'qonlik futbol muxlislariga qo'llab-quvvatlab turishgani uchun minnatdorchilik bildirdi va bundan keyin ularning daldalari har qachongidan ham muhim ekanligini ta'kidladi.
Tanishtiruv marosimida jamoamizning farxiy muxlisi, 86 yoshli Mo'ydin Yo'ldoshev futbolchilarimizga ikkinchi davrada omad tilab “Qo'qon-1912” o'yinchilariga atalgan sherini o'qib berdi.
Shuningdek, jamoamizning yana bir ashaddiy ishqibozi Sherxon Qosimov ham so'zga chiqib,futbolchilarimizga 1-davrada ko'rsatgan o'yinlari uchun muxlislar nomidan minnatdorchilik bildirdilar va ishqibozlarimizga ikkinchi davrada ham futbolchilarimizni xuddi birinchi davradagi kabi qo'llab-quvvatlab turish kerakligini takidlashdi.
Marosim ko'tarinki ruhda o'z yakuniga etdi. Tadbir so'nggida ishqibozlar jamoamizning ertaga bo'ladigan “Nasaf” jamoasiga qarshi o'yindan oldingi mashg'ulotlarini tomosha qilishdi.
"Qo'qon-1912" matbuot xizmati.
