Нурали Султонов: “Иқтидорли, ёш футболчиларимиз билан фахрланамиз”

- Аввалом бор бугунги ёш футболчиларимизнинг ютуғи билан клубимиз раҳбариятини, мураббийларимизни ва клубимизнинг барча ишқибозларини самимий табриклайман. Биринчиликнинг финал босқичидаги рақибларимиз биз билан жиддий кураш олиб боришди. Биз финал босқичига яхши тайёргарлик кўрган эдик ва ёш футболчиларимиз берган кўрсатмаларимизни кўнгилдагидек адо этишди. Натижасига эса ўзларингиз гувоҳ бўлиб турибсиз. Ҳар бир учрашув биз учун қийин кечди, чунки финалга муносиб жамоалар йўл олишганди.

“Насаф” футбол мактабининг ва бу ерда меҳнат қилаётган мураббийларнинг асосий вазифаси – клубимизга муносиб профессионал футболчиларни тарбиялаб етказиб бериш ҳисобланади. Бу мақсад учун барча мураббийлар бир ёқадан бош чиқариб меҳнат қилишмоқда. Бизда барча мураббийлар ўзаро яқин алоқада фаолият юритишади. Масалан, клубимиз бош мураббийи – Ўзбекистонда хизмат кўрсатган спорт устози, Рўзиқул Саъдуллаевич учун тарбияланувчиларимиз иштирокида ҳар қандай учрашув назаридан четда қолмайди. Шунингдек машғулотлар жараёни, услуби, футболдаги янгиликлар мураббийлар ўртасида ўзаро таҳлил қилинади. Бундан керакли хулосалар чиқарилади.

Бизда ҳар бир тарбияланувчига – ёш футболчига эътибор жуда катта. Мураббийларимизнинг мана шундай аҳиллиги, асосий ютуқларимизга омил бўлмоқда. Футбол мактабимиздан етишиб чиқаётган иқтидорли футболчиларимиз билан доимо фахрланамиз.