Bu haqda "Neftchi" matbuot xizmati e'lon qildi.
"Bir vaqtlar "Neftchi" tarkibida himoyachi ampluasida to'p surib, muxlislar e'tiborini qozongan Abdumajid Toirov yana "Neftchi"ga qaytdi. U yoshlar bilan ishlash tizimi rahbari hamda U19 va U21 jamoalari koordinatori sifatida faoliyat yuritadi.
Ma'lumot uchun, Abdumajid Toirov 1974-yil 5-avgust kuni Surxondaryo viloyatida tug'ilgan. Futbolchi sifatida 21 yoshida O'zbekiston oliy ligasida debyutini 1996-yili ASK (Termiz) klubida boshlagan.Futbolchi klub bilan to'rt mavsumni o'tkazdi va 60 ta o'yinda ishtirok etdi. 2000-yilda esa u o'sha davrning eng kuchli klublaridan biri – Farg'onaning „Neftchi“ jamoasiga o'tib, 6 mavsum davomida 160 dan ortiq o'yinda maydonga tushdi. 2001-yilda mamlakat chempioni va to'rt karra kumush medali sovrindori, uch karra O'zbekiston kubogi finalchisi bo'lgan.
Abdumajid Toirov yoshlar bilan ishlashda bor mahoratini ishga solib, quvonchli natijalarga erishadi, deb umid qilamiz" - deyiladi klub rasmiy bayonotida.
