Наврўз Алимов "Пахтакор" футболчисига айланди

Охирги мавсумларда "Қизилқум"даги ўйинлари орқали миллий терма жамоага жалб этилган ҳужумчи Наврўз Алимов фаолиятини "Пахтакор"да давом эттирадиган бўлди. Терма жамоа сафида Дубайга жўнаб кетиши олдидан клуб ва Алимов ўртасида шартнома тузилди.

Ушбу ўтиш тўғрисида клуб менежери Самвел Бабаян қуйидаги фикрларни билдирди:

- "Пахтакор" селекция хизмати ҳамиша юртимиздаги иқтидорли футболчиларни кузатиб, улар ҳақида маълумотларни тўплаб келади. Наврўз Алимовни "Қизилқум" ёшлари таркибида ўйнаб юрганидан бери кузатиб келганмиз. Олий лига беллашувларида яхши таассурот қолдирган Алимов "Пахтакор"нинг шундоқ ҳам кучли бўлган ҳужум чизиғида рақобатни янада ошириши табиий. Ўзим ҳам ушбу ҳужумчининг ўйинларини анчадан бери кузатиб келаман. У жамоамизда юқори савиядаги ҳужумчига айланиб, совринларга эга чиқади деб умид қиламан.

Наврўз Алимов
Туғилган санаси: 21.03.1992
Олий лигада 32 учрашувда 4 тўп киритган. Миллий терма жамоада 8 ўйинда 1 гол муаллифи бўлган.