Миржалол Қурбонов: “Олимпик” билан дуранг адолатли бўлди”

“Биз “Олимпик” жамоасини яхши эканлигини билардик. Шуни ҳисобга олган ҳолда, ўйинга астойдил тайёргарлик кўрдик. Рақибимиз ёш ва иқтидорли футболчилар ҳисобига ташкил қилингани билинди. Уларда кўплаб вазиятлар юзага келди. Дарвозабонимиз ҳам кўп вазиятларда жамоамизни голлардан асради. Бир сўз билан айтадиган бўлсам, ушбу ўйинда ғалаба қозонишимиз ёки ютқазишимиз ҳам мумкин эди. Дуранг адолатли бўлди дейиш мумкин", - дейди Қурбонов. 

- Саиджамол Давлатжоновни четлатиши “Хоразм”га сўнгги дақиқаларда қанчалик муаммолар келтирди?
- Албатта, четлатишдан сўнг “Олимпик” янада кўпроқ ҳужум уюштирди. Улар ғалаба қозониш учун бор кучлари билан ҳаракат қилди. Бир киши кам бўлиб қолганимиздан келиб чиқиб, ҳимояга кўпроқ эътибор қаратдик.

- “Хоразм” мавсумнинг қолган ўйинларида ўз олдига қандай мақсадларни қўйган?
- Аслида мавсумни юқори ўринларнинг бирида тугатиш вазифаси қўйилган эди. “Оқ-тепа” ҳамда “Истиқлол”нинг мусобақадан эрта чиқиб кетиши, бизнинг мақсадларимизга ўз таъсирини кўрсатди. Биздан ҳам олти очко олиб ташланди. Шу туфайли, қолган ўйинларда ғалаба қозонишимиз ва ўзимиз учун керакли очколарни жамғарган ҳолда, мавсумни бешликда тугатмоқчимиз.

- Клубнинг бугунги кундаги молиявий ҳолати хусусида нималарни айта оласиз?
- Молиявий ҳолатимиз чакки эмас. Клубда маош ўз вақтида берилмоқда. Раҳбарият шу томондан футболчиларни қўллаб-қувватламоқда ва амалий ёрдамини бериб бормоқда.