Табиийки, мазкур ўйинлардан сўнг ҳаммада турлича фикрлар янграмоқда. Биз бу борада "Металлург" спорт директори Фарзод Зариповнинг фикрлари билан қизиқдик.
— Жаҳон чемпионатидан реал ва мухлислик нуқтаи назаридан кутилмалар қандай?
— Ўзбекистон — ватанимиз учун Жаҳон чемпионати жуда катта тарихий воқеа ҳисобланади. Бутун жаҳон ҳамжамиятига эшик очиб кирдик, десак бўлади. Мухлисларимизнинг неча йиллик орзуси амалга ошди. Кутилмаларга келсак, асосийси, футболчиларимиз Колумбия, Португалия ва Конгога муносиб қаршилик кўрсатишсин. Ўзбек футболи тўғри ривожланиш йўлида эканлигини кўрсата олишлари керак. 2024 йилда биринчи маротаба Олимпиадада иштирок этдик. Ўсмирларимиз, ёшларимиз қитъа миқёсидаги турнирларда муносиб қатнашишмоқда, Жаҳон чемпионатларининг доимий иштирокчисига айланишди. Энди миллий жамоамизга навбат. Гарчи Колумбия ва Португалия фаворит дейилаётган бўлса-да, бизнинг футболимиз савияси ҳам анча ўсганлигини кўрсатишларини кутяпмиз. Тўғри, ҳаяжон йўқ эмас. Биз футболчиларимизга ишонамиз. Бу Жаҳон чемпионатида натижа муҳим эмас, чунки мундиалга чиққанимизнинг ўзи — катта натижа. Улар ўзларини, мухлисларнинг юзини ёруғ қилиб қайтишса бўлгани.
— Ўртоқлик ўйинларидан сўнг босим жуда кўпайиб кетди. Бу қанчалик тўғри?
— Мундиалда йигитлардан босимни олиб ташлаш керак. Босим қилинаверилса, футболчиларимизнинг ўйини чиқмай қолади. Улар шунчаки завқ олиб ўйнашлари керак. Каннаваронинг бу борадаги фикрига қўшиламан. Яхши ҳаракат қилинса, учинчи ўрин билан кейинги босқичга чиқиш имкониятларимиз етарли деб ҳисоблайман.
— Ўртоқлик учрашувларидан сўнг қандай хулосалар юзага келди?
— Канада ва Нидерландия билан ўртоқлик учрашувларида терма жамоамизнинг ҳақиқий имкониятлари кўрингани йўқ. Тўғри, Каннаваро карталарни беркитиб, қандайдир тактик юриш қилди, деб ўйламайман. Захирамиз унчалик узун эмас. Каннаварода ротациялар қилиб, рақибни чалғитиш учун имкониятлар катта эмаслигини ҳам тан олиш керак. Канада билан аввал учрашганмиз, лекин Нидерландия билан тарихда илк бор ўйнадик. Руҳий томондан бу фойда бўлди. Нидерландиянинг нуфузи Португалия билан тенг, Конго ва Колумбияникидан эса юқорироқ. ЎФА раҳбарияти Нидерландия билан баҳсни яхши ташкил қилган.
— Сиз кўрган илк Жаҳон чемпионати ва кузатган мусобақаларингиздан энг ёдда қолгани қайси бўлган?
— 2006 йилги Жаҳон чемпионати Зиданнинг қизил карточкаси ва Матерацци билан можароси орқали эсда қолган. Пенальтидан Зиданнинг "паненка" услубида йўллаган зарбаси ҳам ажойиб чиққан. Лекин пенальтилар сериясида Италия ғолиб бўлган. Бу — мен кўрган илк Жаҳон чемпионати эди. Яна бир ёдда қоларли воқеа: 2010 йилги Жаҳон чемпионатида ўзбекистонлик ҳакам Равшан Эрматовнинг дебютидир. Рафаэль Илясов ҳамда қирғизистонлик Баҳодир Қўчқоровнинг иштирок этгани катта воқелик сифатида қабул қилинган. Равшан Эрматов кейинчалик 2014 ва 2018 йилги Жаҳон чемпионатларида ҳам қатнашди ва энг кўп ўйин бошқарган ҳакам сифатида тарихга кирди. 2026 йилга келиб, ниҳоят, миллий терма жамоамиз ҳам Жаҳон чемпионатида қатнашади. Бу ўзгача ғурур беради.
