Мағлубиятга лойиқ бўлмаган Тибо Куртуа...

Ўзига хос парадокс — ўйиндан келиб чиқсак, ПСЖ ютиши керак эди, лекин шу билан бирга Куртуа майдонни мағлуб сифатида тарк этишга лойиқ эмасди. 

Агар "Мадрид" сафида мағлубиятга лойиқ бўлмаган биргина футболчи бўлса ҳам, у шубҳасиз Тибо Куртуа бўлади. Ҳа, Милитао, Каземиро ва балки Алаба ҳам яхши ўйин ўтказгандир, аммо Куртуа улардан бироз яхшироқ ўйин ўтказди. Сўнгги сониялардаги Мбаппенинг голи бельгияликнинг хизматларини йўққа чиқара олмайди. Ким билади дейсиз, агар дарвозада Куртуа бўлмаганида ҳисоб бошқачароқ кўриниш олармиди...

Ўйин давомида ҳатто Лео Месси ижросидаги пенальтини ҳам қайтарган Тибо Куртуа ЕЧЛ доирасида дарвозасига аниқ келган охирги 23 зарбанинг 22 тасини қайтаришга муваффақ бўлди. 

Бельгиялик 2007 йилдан буён "Мадрид" сафида ЕЧЛ учрашувида пенальти қайтарган биринчи киперга айланди. 

Куртуа мавсумда учинчи бор (кетма-кет) ўн бир метрлик нуқтадан берилган зарбани бартараф қилмоқда. Аввалроқ Тибо қўлқопларидан чемпионат доирасида "Валенсия", Суперкубок баҳсида "Атлетик" азият чекканди. 

Энди 3 ҳафтадан сўнг жамоалар Мадридда рўбаро келишади ва интригани айнан Куртуа сақлаб қолди десак муболаға бўлмайди.