Илёс Зейтуллаев: "Янги стадионда тўп тепиш ўзгача ҳиссиётларни берди"

- Ўйин ҳақида фикрингиз?

- Янги стадионда тўп тепиш ўзгача ҳиссиётларни берди. Олимпия мажмуаси жуда ажойиб қурилган экан. Ўйин ҳақида гапирадиган бўлсам, йигитлар жуда қийин баҳсни ўтказди. Ғалаба билан жамоамизни табриклайман. Биз "Хоразм"га қарши осон бўлмаслигини билардик, чунки бу жамоа Суперлигада қолиш учун кураш олиб боряпти ва ҳар бир ўйинда жанг қиляпти.

- "Бунёдкор" тезкор ўйин кўрсатишини биламиз, аммо бугун футболчилар оғир ҳаракат қилгандек кўринди.

- Мен эса бошқача фикрдаман. Жамоам сифатли ўйин намойиш этди деб ўйлайман. Рақибда тажрибали мураббий бор, жамоа ҳам яхши. Биз шунга кўра ҳозирлик кўрдик. "Хоразм" очко учун келишини билардик. Балки улар ютиб кетиши ҳам мумкин эди. Биз бугун секин, лекин сифатли футбол намойиш этишга ҳаракат қилдик.

- Майдон ҳолати ҳақида фикрингиз?

- Майдон ҳолати яхши. Умуман ҳаммага яхши майдонлар керак. Суперлигадаги барча жамоалар яхши майдонда тўп тепиши керак, шундагина футболни ўстириш ҳақида ўйласак бўлади. Тўғри, бу осон эмас, вақт ва маблағ талаб этади.

- "Бунёдкор" ҳозирча тўртинчи ўринда кетяпти. Бунда кимнинг хизматлари юқори деб ўйлайсиз?

- Бунда ҳамманинг ҳиссаси бор. Йил бошида раҳбарияти билан қандай иш олиб бориш, кимларга рақобат қилиш ҳақида гаплашиб олгандик. Ўз йўлимизни танлаб олиш борасида ҳам бир нечта вариант илгари сурилган. Энг муҳими, ўз ғояларимизни футболчиларга сингдириа билиш. Барибир футбол йўлидан юриш ҳаммага қулай кўринади.