– Ўйин ҳақидаги фикрларингиз.
– Ғалаба билан шогирдларимизни табриклаймиз. Бугун яхши ўйин кўрсатишди. Футболчиларимиз билишадики, Пролигада тўғридан-тўғри рақобатчимиз "Арал" бўлади. Лекин барибир кубок ўйинида ҳам биз уларни ютишимиз керак, буни 2-3 кун олдин мураббийлар штаби билан таъкидлаган эдик. Футболчилар вазифани бажаришди, 3 очкони қўлга киритишди. Давом этамиз, кейинги ўйинга тайёргарлик кўрамиз.
– Кубокда жамоа олдига қандай вазифа қўйилган?
– Кубокка келадиган бўлсак, бундан олдин ҳам айтганман, асосий мақсадимиз – чемпион бўлиб Суперлигага чиқиш. Лекин кубокда ҳам ҳар бир мураббий, ҳар бир футболчи ютқазишни хоҳламайди. Максимал даражада ҳаракат қиляпмиз. Асосан ўйин амалиёти кам бўлган футболчиларни туширяпмиз. Уларга гап йўқ, чунки улар ҳозир асосий ўйинчиларга айланишяпти, деб ўйлайман. Охирги ўйинимизни "Қўқон-1912" билан ўтказамиз ва шу билан сўнгги учта ўйинимизни якунлаб қўямиз.
– Ўзингиз айтиб ўтганингиздек, кейинги ўйинда "Қўқон-1912" меҳмон бўлади. Уларнинг ўйинларини ўрганиб кўрдингизми, нима дея оласиз?
– "Қўқон-1912"нинг ўйинини ҳали тўлиқ ўрганмадик-ку, бироқ уларнинг "Арал" билан ўйинини кўрдик. "Арал"нинг майдонини биласизлар, у ерда "Қўқон-1912" бошқача ўйин кўрсатган. Энди мана шу сўнгги ўйинини таҳлил қилиб, шунга қараб майдонга чиқамиз.
– Бугун дарвозани Моҳир Комилов қўриқлади. Унинг ҳаракатларини қандай баҳолайсиз?
– Моҳир Комиловга айтадиган гапим – респект, баракалла! Ўйинни ўқий билиши ҳам зўр. Озгина хатолари бор, лекин барибир иккита асосий дарвозабонимиз бор – Султонов ва Комилов, шунингдек, Алиев ҳам бор. Ҳозир уларга имконият беряпмиз ва ўйинларда ротация қилиб турамиз.
– Бугунги ўйинда жамоа етакчиларидан бири Бранимир Йочич қайдномада йўқ эди. Бу жароҳат билан боғлиқми ёки ротациями?
– Йочичда жароҳат бор. Бубаньяда ҳам, Тожиддиновда ҳам жароҳат бор. Жами уч нафар ўйинчимиз жароҳат олган. Яна уч нафар футболчимиз – Шоаҳмедов, Мирзоҳид Ғофуров ва Мўйдиновга дам бердик. Хулоса қилиб айтганда, бугун таркибда олти киши йўқ эди.
– Гуруҳдаги давом этаётган иккинчи учрашувда ОКМК жамоаси сафарда ғалаба қозонмоқда. Агар шу натижа сақланиб қолса, учинчи турда жамоага "Қўқон-1912" билан дуранг натижа ҳам етарли бўлади. Агар вазият шундай қолса, жамоа дурангга ўйнаши мумкинми?
– Бироз аввал таъкидлаб ўтдим, кубок ўйинларига унчалик қаттиқ урғу бермаяпмиз. Лекин ҳозирги имкониятимиздан келиб чиққан ҳолда, футболчиларнинг ўзлари ҳам мотивация олиб, кейинги босқичга чиқишга ҳаракат қилишса керак. Агар "Қўқон-1912" ютқазаётган бўлса, кутамиз. Олдинда жиддий тайёргарлик кўришимиз керак бўлган ўйин турибди. Бу клублар Суперлига жамоалари ҳисобланади ва биз қўлимиздан келганча ўйнаймиз. Асосийси, шу ўйинлар орқали чемпионатга тайёргарлик кўряпмиз.
