Энди олий лигада 12та клуб ўйнайди. Бунга футболчилар нима дейди?

Чемпионат ўйинлари эса 3 давра тизимида ўтказиладиган бўлди. 2018 йилги олий лига иштирокчиларини аниқлашда 2017 йилги футбол мавсуми ҳамда 2018 йилги мавсумга футбол клубларини лицензиялаш якунлари асос бўлиб хизмат қиладиган бўлди. Натижада, 2018 йилги мусобақада 2017 йилда 1–11 ўринларни эгаллаган 11 жамоага Биринчи лига мусобақаларида ғолиби бўлган футбол клуби қўшиладиган бўлди.

Олий лига тугашига 4та тур қолганида қабул қилинган ушбу қарор борасида бир қатор футболчиларга мурожаат қилдик. Уларга бир хил савол бердик: Олий лигада 12та клуб ўйнаши яхшими ёки ёмон?

Рустам Ашурматов ("Бунёдкор", жамоаси 4-ўринда):
Тўғрисини айтсам бундай қарорни бирданига қабул қилинишини кутмагандим. Бу қарор балки тўғридир, лекин жадвалнинг қуйи қисмида бораётган жамоалар ва биринчи лигада курашаётган клублар учун оғир ботди деб ўйлайман. Чунки лар йил давомида меҳнат қилиб олий лигага чиқишни маҳсад қилишганди. Балки яхшиликкадур, буни вақт кўрсатади. Фақатгина бир нарсани айтишим мумкин: бошқа жамоаларга қараганда биринчи лигадаги олий лига учун курашаётган "Истиқлол" ва "Андижон" жамоаларига жуда аламли қарор бўлди.

Олий лигада фақат кучли жамолар бўлгани яхши, мухлислар кўпроқ қизиқарли ўйинлар гувоҳига айланишади. Бу эса ҳар томонлама бизга фойда келтиради. Танганинг иккинчи томони ҳам бор. Жамоалар сони камайгани билан бошқа муаммоларимиз бор, шу муаммоларни бартараф этмагунимизча олий лигамиз кучайишwи қийин.

Жамшид Ҳасанов ("Қўқон-1912", жамоаси 6-ўринда):
Яхши қарор, лекин буни менимча бир икки йил олдин огоҳлантиришса яхши бўларди. Жамоалар шунга қараб кураш олиб боришарди. Ҳозр дарҳол бу қонун чиқарилиши менимча нотўғри бўлса керак. Бу кўп клубларга зарар етказди. Кейинги йил менимча курашларга бой мавсум бўлса керак, барча гап қарорнинг кутилмаганда ва мавсум охирида қабул қилинганида бўлди.

Жавоҳир Илёсов ("Машъал", жамоаси 8-ўринда):
Бу қарор яхши, лекин ҳозир мавсум тугаётганида кейинги йил 11та клуб қолади, қолган 5та клуб биринчи лигага тушиб кетади деб айтишганида, жамоалар кейинги йил мана шу 11талика киришга ҳаракат қилишарди. Айни пайтда чемпионат тугашига 4та тур қолди, энди кўп жамоалар қийналиб қолишади. Лигада қолишга деярли ишонч ҳосил қилганлар энди бу қарордан кейин биринчи лигага тушиб кетишлари ҳеч гап эмас.

Ғулом Ҳайдар Ғуломов ("Олмалиқ", жамоаси 9-ўринда):
Нима мақсадда 12та клуб қолдирилди? Барчаси сабабига боғлиқ. Агар мана шу 12та клуб қолиши Ўзбекистон футболи ривожи учун катта хисса қўшса мен бу қарорга қўшиламан. Агар фойда келтирмаса ва чемпионатда ўсиш кузатилмаса 16та клуб қолавергани яхши. Шахсий фикрим чемпионат тугашига 4та тур қолганида бу қарорни эълон қилиниши нотўғри.

Нодирхон Камолов ("Қизилқум" жамоаси 11-ўринда):
Бир томондан олий лигага чиқиш учун кураш қизғин бўлади, иккинчи томондан олий лигада оз жамоа қолиши яхши эмас деб ўйламан, яна бирданига 12та жамоа қолиши ва бирданига 4та жамоа тушиб кетиши... Тахминимча "Нефтчи", "Сўғдиёна" ва "Шўртан" 11таликка кира олмаса керак. У клуб мухлисларига ачинаман холос. Чемпионат 3 даврали тарзда ўтиши яхши, аммо 12 эмас 14та клуб иштирокида бўлганда маъқул бўларди.  Бу футболчилар учун айниқса яхши қарор бўларди. Ҳар доим ўйин амалиётида бўлардик ва ўйинлар жуда тез келарди.

Дониёр Исмоилов ("Динамо", жамоаси 12-ўринда):
Менимча ёмон бўлса керак, чемпионат тугашига 4та тур қолганида бундай қарор чиқиши жуда оғир. Ҳозир футболчилар машғулот ҳам ўтказишни истамай қўйишди. Бу қарорни йил бошида айтиш керак эди деб ҳисоблайман.

Жавлон Гусейнов ("Сўғдиёна", жамоаси 13-ўринда):
Барча қилинаёган иш яхшиликка, рақобат кучаяди жамоалар орасида ҳам футболчилар орасида ҳам, лекин буни тўсатдан эълон қилиш мантиққа тўғри келмади чамамда...регламент нима бўлди? Кейинги йилда 11-ўриндан пастдагилар тушиб кетади деб айтилса бошқачароқ бўлармиди, янаям билмадим.

Достон Турсунов ("Нефтчи", жамоаси 15-ўринда):
Олий лигамизда 12та клуб қолиши бир томондан яхшиликкадир. Аммо ҳозирги вазиятда бу жамоамиз учун жуда ёмон қарор. Бизни олдиндан огоҳлантиришмади ҳам. Дарҳол 12та жамоа қолади деб айтишди холос. Кўпчилик футболчилар тушкунликка тушиб қолишди. Мақсадимиз 4та ўйинда ғалаба қозониш. Уёғи нима бўлишини кўрамиз.

Фарҳод Бекмуротов ("Андижон", жамоаси биринчи лигада 3-ўринда):
Энди бу қарорни ЎФФ қабул қилди, унинг ҳар бири қарорини ҳурмат қилишимиз керак. Лекин менимча бу иш бир йил аввал режалаштирилганда яхши бўларди. Масалан, биз иккинчи ўрин учун курашаётгандик, энди охирги ўйиннинг натижаси аҳамиятсиз бўлиб қолди...Олий лигада сўнгги ўринларда бораётган жамоалар учун ҳар бир ўйин финалдек бўлади. Кейинги йил биринчи лига ҳам кучаяди. Шахсий фикрим олий лигада барибир 16та жамоа қолиши керак эди.


Нарзулла Сайдуллаев ёзиб олди