"Динамо" дастлабки йиғинни якунлади

6 июлдан 16 июлгача давом этган ўқув-йиғин машғулотларида Камо Газаров бошчилигидаги мураббийлар штаби асосий эътиборни футболчиларнинг жисмоний ҳолатига қаратишди. 10 кунлик машғулотлардан сўнг, жамоа 16 июль куни Самарқандда икки таркибга бўлиниб ўзаро ўйин ўтказади. Шундан сўнг футболчиларга икки кунлик дам берилади.

19 июлдан эса жамоа Тошкентда йиғин бошлайди. Пойтахтда ўтказиладиган учта назорат учрашувида таркибда ўзгаришлар бўлиши мумкин. Хусусан, дастлаб «Машъал» жамоаси билан ўйин ўтказилса, 24 июлда «Пахтакор»га қарши, 25 июлда эса «Навбаҳор» билан назорат ўйинлари ўтказилади. 26 июлда эса жамоа яна Самарқандга қайтиб, тайёргарликнинг сўнгги қисмини ўз қароргоҳида ўтказади.

Эслатиб ўтамиз, «Динамо» 3 август куни ўз майдонида 14-тур доирасида «Насаф» жамоасига қарши саф тортади.