Даврон Файзиев: "Учинчи голда оффсайд борга ўхшади"

- Шу фурсатдан фойдаланиб, бутун халқимизни кириб келаётган Рамазон ойи билан табриклайман. Бугунги ўйин шу рамазон ойидан олдин тўғри келди. Учрашув жуда асабий ўтди. Мухлисларбоп, курашларга бой ўйин гувоҳига айландик. Футболда ҳамма хато қилади. Биринчи навбатда айбни ўзимдан қидиришни бошладим.

"Пахтакор"дек жамоага иккита тўп киритиб мағлубиятга учратиш ёки улардан очко учун  камлик қилади. Футболчилар иккинчи голдан кейин хотиржамликка берилишди. Бу ҳолатлар бўйича футболчилар билан эртага бемалол гаплашиб оламиз. Ўйинни тўлиқ таҳлил қилиб чиқамиз.

Ҳакамлар хонасига киришга ошиқдим? Мени кўришим бўйича, учинчи голда ён ҳакам озгина хатоликка йўл қўйди. Гол бўлган вазиятда Сергеев ва Ораховацда ўйиндан ташқари ҳолати бор эди, чамамда. Буни аниқ айтолмайман, лекин бизнинг оператор олган тасвир бўйича кўпроқ оффсайдга ўхшади. Балки адашаётгандирман. Ўйиндан кейин барчада қизишиш бўлади, эҳтирослар жўмбушга келади. Буни батафсил кўргандан кейин билиб оламиз. Мен ҳакамларни айбламоқчи эмасман.

Жамоамиз бу йил буткул янгиланди. Биз имкон қадар яхши, рақобатбардош ва кучли жамоани шакллантиришга ҳаракат қиляпмиз.

Рамазон ойида барча кечиримли бўлади. Агар такрорий ҳолатдан кейин ён ҳакам адашганини билсам кечирармидим? Бундан бошқа чорам йўқ. Агар кечирмаганимда ҳам бир нарса ўзгарармиди? Натижа ўзгарадиган бўлса, унда кечирмаган бўлардим.