Чин юриш ёхуд Хитой пулининг еврофутбол томон оқими

Осмон-ўпар юрт вакиллари кўзларига нима кўринса, ўшани сотиб олишяпти - металлургия компаниялари, кимёвий заводлар, озиқ-овқат йўналишидаги  фирмалар... Шунингдек, футболчилар ва футбол клублари ҳам Чин ўлкаси сармоядорлари назаридан четда қолмаяпти. «Футбол» ҳафтаномаси айнан хитойликлар ихтиёрига ўтган элит чемпионат клубларига эътибор қаратди ва битта хулосага келди: «Агар улар еврофутболдаги ўз жамоалари иштирокида алоҳида турнир ташкил этишсами, унинг олдида ҳаттоки, Чемпионлар Лигаси ҳам хира кўринади».

1. «Атлетико» (Испания) - Wanda Group - 45 млн. евро

2015 йилнинг январь ойида Хитойнинг йирик девелопер (тараққиётга қаратилган) компанияси - Wanda Group «Атлетико»нинг 20 фоиз акциясини сотиб олиш бўйича келишувга эришди. Ушбу гигант компания Хитойнинг турли ҳудудларида нақ 98та бизнес-марказ, 60та беш юлдузли меҳмонхона, 78та савдо марказига эга. Компания раиси, хитойлик миллиардер Ван Цзяньлинь Мадрид клубининг 726707 дона  акцияси учун деярли 45 млн. евро тўлади. Шартнома тузиш чоғи Хитойда «Атлетико»га тегишли 3та мактаб очиш ва «матрасчилар»нинг Осиё мамлакатлари бўйлаб махсус турнега чиқишлари ҳам кўзда тутилди. Томонлар шунингдек, Мадридда ёшлар маркази бунёд этиш учун 34 млн. доллар ажратишга келишиб олишди. Режага кўра, ушбу марказда асосан хитойлик ёш футболчилар шуғулланишлари керак.

Сўз. «Wanda Group «Атлетико»нинг тараққиётига ўз ҳиссасини қўшиш ва клуб брендининг Осиёда тарғиб этиш имкониятига эга бўлганидан жуда хурсанд. Ўйлайманки, биз ҳамкорлик доирасида кадрлар тайёрлаш йўналишида ҳам катта тажриба тўплаймиз ва бу Хитойда футболни янги даражага кўтаришда анча қўл келади, шубҳасиз». Ван ЦЗЯНЬЛИНЬ.

2. «Эспаньол» (Испания) - Rastar Group - 14-18 млн. евро

«Эспаньол» испан футболининг 115 йиллик тарихида хорижлик сармоядорлар назоратига ўтган илк клуб бўлди. Хитойлик миллиардер Чен Яншен жорий йилнинг январида Каталония жамоасининг 54 фоиз акцияни сотиб олди. У болалар учун ўйинчоқ автомобиллар ва пластмасса жиҳозлар хом ашёси ишлаб чиқаришга ихтисослашган Rastar Group (олдинги номи  — Xinghui Auto Model) компанияси хўжайинидир. «Эспаньол»ни расман сотиб олиш келишуви баҳоси 14-18 млн. еврони ташкил қилди. Хитойлик сармоядорлар зиммасига тушган асосий вазифа 2та - клубнинг ташқи қарзи (191 млн. евро)ни узиш ва умумий маблағ айланмасини 90 млн. еврогача кўтариш.

Сўз. «Биз клубнинг тарихий анъаналари ва бизнес ривожи ўртасида мувозанатни сақлаб қолишга ҳаракат қиламиз. Барча ҳамкорларимиз лойиҳанинг улкан потенциали борлигини таъкидлашмоқда. Умид қиламанки, Хитой сармояси «Эспаньол»нинг янги чўққиларни забт этишига йўл очади. Шахсан мен келишувимиз тез орада самара бериши ва жамоанинг натижалари яхшиланиб, унинг ўз олдига ЧЛга чиқиш вазифасини қўйишига шубҳа қилмайман». Чен ЯНШЕН.

3. «Гранада» (Испания) - Link International Sports Limited - 37 млн. евро

2009 йили Поццолар оиласи «Гранада»ни сотиб олган пайт клуб иккинчи сегундада бўлиб, таназзул ёқасида эди.  Шундан 2 йил ўтиб, жамоа примерога чиқди. Мана, жорий ёзда «Гранада» акциялари назорат пакети хитойлик Цзянь Лижанг тасарруфига ўтди. Унинг компанияси - Link International Sports Limited дунё спортидаги йирик мусобақаларга саёҳат уюштириш билан шуғулланади. Лижанг клуб расмий сайтига берган интервьюсида Жино Поццо ва «Гранада»нинг собиқ президенти Кике Пине (аслида у ушбу келишувга қатъиян қарши эди)га қилинган ишлар учун алоҳида миннатдорчилик билдириш баробарида мухлисларни келажакка умид билан қарашга чақирди.

Сўз. «Мақсадимиз тайин - клубнинг барча йўналишлардаги ишларини яхшиламоқчимиз. Биз шу йўл билан лигада ўз тарихимизни яратамиз ва имкон борича юқорига интиламиз. Хуллас, ёрқин келажакка умид боғлайверинг». Цзянь ЛИЖАНГ.

4. «Интер» (Италия) - Suning Commerce Group - 270 млн. евро

Йирик савдо тармоғи - Suning Commerce Group шу йил июнь ойи бошида «Интер» клубининг 68,55 фоиздан кўпроқ акциясини чамаси 270 млн. еврога сотиб олганини эълон қилди. Шу заҳоти итальян жамоаси директорлар кенгашига Хитой компаниясининг 5 нафар вакили қўшилди ва эндиликда «нерадзурралар» тақдири уларга ҳам боғлиқ. Умуман, хитойликлар зудлик билан клуб равнақи учун каттагина маблағ ажратишга ваъда бериб, «қора-кўклар» мухлисларини тинчлантиришди. Савдо тармоғи бошқарув раиси Чжан Цзиньдун эса доимий равишда сармоя киритилиши «Интер»га иқтидорли футболчиларни кўпроқ жалб этиш имконини беришини таъкидлади. Келишув натижасига кўра, клубнинг собиқ президенти ва хўжайини Массимо Моратти расман четга чиқди, унга тегишли Internazionale Holding холдинги ҳам акционерлар рўйхатидан ўчирилди. Индонезиялик бизнесмен Эрик Тоҳир эса «Интер» президенти сифатида қолди, аммо унинг акционерлар сармоясидаги улуши 31 фоизга тушди. «Ҳамкорлик самараси ўлароқ, олдинга қадам ташлаб,  «Интер»ни жаҳон футболида ўзига муносиб жойга қайтарамиз. Чунончи, Осиё, хусусан, Хитойда футбол тобора оммалашяпти. Демакки, Suning Group компанияси билан тузилган шартнома ёрдамида Хитой ва бутун Осиёдаги мухлисларимиз армиясига анча яқинлашамиз. Умид қиламанки, бу келишувдан ҳаддан зиёд кўп манфаат кўрамиз», — дея баёнот берди Тоҳир.

Сўз. «Хитой «Интер»нинг иккинчи уйига айланади, Suning сармояси эса бутун дунёдан энг сара юлдузларни таклиф этиш ва клубнинг аввалги обрўсини тиклашга ёрдам беради». ЧжанЦЗИНЬДУН.

5. «Милан» (Италия) - Europe Sports Investment Management Changxing - 198 млн. евро

«Интер» ортидан «Милан» ҳам хитойликлар ихтиёрига ўтди. Сильвио Берлускони 2005 йили клубни сотишга қарор қилганди ва узоқ вақт реал харидорлар билан музокаралар олиб борди. Табиийки, бу жараён мураккаб кечди, лекин хитойликлар жиддий ваъдалар билан Сильвио бобони савдога кўндиришди. Хуллас, улар аввало, «Милан»ни Европанинг топ-клублари қаторига қайтариш ниятидалар. Бунга илк исбот сифатида 740 млн. евроли чекка имзо чекишдан ташқари, клубнинг 220 млн. еврога тенг қарзини ҳам ўз бўйниларига олишди. Тахмин қилинишича, белгиланган сумма 3 йил давомида бўлиб-бўлиб берилади. Яъни ҳар йили чамаси 350 млн. евро тўланади. Айтиш жоиз, янги сармоядорлар орасида Хитойнинг тараққиёт ва инвестиция бўйича ҳукумат  корпорацияси - SDIC, шунингдек, Haixia Capital компанияси ва Sino-Europe Sports Investment Management Changxing раиси Хан Ли бор. Айнан Хан Ли асосий сармоядор сифатида кўрсатилмоқда.

Сўз. «Мана, ниҳоят, ўта муҳим тўхтамга келдим. Мен «Милан»ни ишончли қўлларга топширишни истагандим. Ўйлайманки, клубни унинг аввалги шуҳратини тиклашга қодир инсонларга сотдим». Сильвио БЕРЛУСКОНИ.

6. «Ницца» (Франция) - Чен Ли ва Алекс Женг бошқарувидаги Хитой-Америка консорциуми - сумма ноаниқ

«Ницца» клубининг 80 фоиз акцияси хариди бўйича келишув мураккаб структурага эга. Зеро, шунча акция бирданига 4 нафар сармоядор томонидан сотиб олинди. Хитой-Америка консорциумини NewCity Capital асосчиси ва бош директори Чен Ли ҳамда Plateno меҳмонхоналар тармоғи президенти Алекс Женг биргаликда бошқаришади. Унинг таркибига шунингдек, америкалик бизнесменлар - Пол Конвей ва Эллиот Хейс ҳам киришди. Келишувнинг молиявий шартлари ошкор этилмади. 80 фоиз акция 4 нафар харидор ўртасида қандай тақсимлангани ҳам номаълум. Клубнинг қолган 20 фоиз акцияси соҳиби саналган Жан-Пьер Ривьер президент лавозимида ишини давом эттиради.

Сўз. «Франция чемпионатида хорижлик янги сармоядорларни кўриш ёқимли. Бизда жамоа таркибига хитойлик футболчиларни таклиф этиш режаси йўқ. Лекин Хитойнинг улкан мамлакат эканлиги барчага маълум ва унинг футбол ҳамжамиятига ҳам катта таъсир ўтказа олиши муқаррар. «Ницца»ни барча йўналишлар бўйича ривожлантириб борамиз. Хусусан, клубимиз энди трансферлар бозорида ҳам ўзини дадил тутиши мумкин. Жамоа бренди бутун дунёга машҳур бўлиши учун бор тажрибамиз ва имкониятларни ишга соламиз. Сармоядорлар камида яна 3 йил бошқарувда қолишимизни сўрашди ва биз бунга тайёрмиз». Жан-Пьер РИВЬЕР.

7. «Сошо» (Франция) - Ledus - 7 млн. евро

Франциянинг «Сошо» клуби Европада биринчи бўлиб, хитойликлар назоратига ўтди. «Пежо» автомобиль компанияси ва клубнинг собиқ соҳиби ўз улушини атиги 7 млн. еврога сотиб юборди. Янги хўжайин мақомини олган Ledus компанияси электрон жиҳозлар ва диодли лампалар технологияси ишлаб чиқариш билан шуғулланади. «Сошо» айни пайт Франция иккинчи дивизионида ўйнамоқда ва яқин орада мўъжизавий харидларга қўл урмоқчи эмас. Тўғри, жамоа мухлислари янги хўжайинларнинг ҳозирги позицияларини маъқулламаяптилар. Улар ҳаттоки, клуб президенти Винг Санг Лини футболда ҳеч нарсани тушунмасликда айблаб, келажакка катта хавотир билан қарашяпти.

Сўз. «Биз савдогар эмасмиз. Чунончи, узоқ муддатга мўлжалланган режамиз бор. Биринчи навбатда, клуб академиясини ривожлантиришимиз керак». «Ницца» вакили.

8. «Лион» (Франция) - IDG Capital Partners - 100 млн. евро

Хитой инвестицион фонди - IDG Capital Partners шу йил август ойида «Лион»нинг 20 фоиз акцияси учун 100 млн. евро тўлади. Асосий соҳиб сифатида қолган OL Groupe компанияси келишув ортидан тушган маблағ ҳисобига жамоанинг еврокубокларда муваффақиятли иштирок этишини таъминлаш ниятида. IDG Capital Partners «Лион»нинг Хитой, Гонконг, Макао ва Хитой Тайпейида танилиши йўлида хизмат қилади. Хусусан, маҳаллий корпорациялар билан ҳамкорлик шартномалари тузилади ва уларга асосан икки мамлакатда футбол мактаблари очилади.

Сўз. «Хитой компанияси билан ҳамкорлик «Лион»нинг халқаро мақсадларига жиддий туртки беради». Жан-Мишель ОЛЬЯС («Лион» президенти).

9. «Астон Вилла» (Англия) - Recon Group - 85,95 млн. евро

Хитойликлар жорий йил ёзда Англия томон юриш бошлашди ва Бирмингемнинг «Астон Вилла» жамоаси уларнинг илк «ўлжа»лари бўлди. Хуллас, клуб хитойлик тадбиркор, Recon Group компанияси раҳбари Ся Цзяньтун (оддий айтганда, Тони Ся) ихтиёрига топширилди. Норасмий хабарларга кўра, келишув баҳоси 85,95 млн. еврони ташкил этган. Агар «Астон Вилла» жорий мавсум якунига кўра, премьер-лига йўлланмасини қўлга киритса, бу сумма ўз-ўзидан 118,6 млн. еврога ошади. Recon Group бизнеснинг турли соҳаларида фаолият олиб борувчи компаниялардан назорат улуши олади. Хуллас, унинг йўналиши жуда кенг - смарт-шаҳарлар учун IT-инфраструктураси қурулиши, электро энергиянинг янги манбалари, соғлиқни сақлаш ва қишлоқ хўжалиги, сайёҳлик, спорт...

Сўз. «Аслида мен «Астон Вилла»нинг эски ишқибозларидан бириман. Мухлисларга ваъда бераманки, жамоа кейинги мавсумдаёқ премьер-лигада ўйнашини таъминлаш учун барча имкониятлардан фойдаланаман». Ся ЦЗЯНЬТУН.

10. «Вулверхэмптон» (Англия) - Fosun - 53,4 млн. евро

Миллиардер Го Гуанчанга тегишли Fosun сармоя компанияси ёзда «Вулверхэмптон»нинг тенг ҳуқуқли соҳибига айланди. Бунинг учун хитойликлар чамаси 53,4 млн. евро тўлашди. Махсус матбуот анжуманида компания вакили Жефф Ши сўз олиб, клуб барча йўналишлар бўйича яхши ҳолатда эканлигини таъкидлади. Шунинг баробарида муваффақият қозониш учун таркибни кучли футболчилар билан бойитиш зарурлигини билдирди. Хитойликлар бу борада португалиялик машҳур агент Жорже Мендеш хизматларидан кенг фойдаланмоқчилар. Янги хўжайинлар келажакда жамоанинг уй стадионини модернизациялаш масаласини ҳам кўриб чиқишни режалаштиришган.

Сўз. «Клубни имкон қадар тезроқ Англия олий дивизионида кўрмоқчимиз ва у элитада узоқ вақт мустаҳкам жойга эга бўлиши шарт. «Вулвз» даражасидаги клублар олдига айнан шундай мақсадларни қўйиш лозим. Тушунамиз, ҳар бир ходим жамоа равнақи йўлида хизмат қилмоқда. Лекин олий мақсадга етишиш йўлида бир қатор тўсиқларни енгиб ўтишга тайёр туришимиз керак. Унутмайликки, мақсад битта ва уни бирлашиб рўёбга чиқаришимиз мумкин». FOSUN компанияси вакили.

11. «МанчестерСити» (Англия) - China Media Capital Holdings - 314,3 млн. евро

2015 йилнинг охирги кунлари хитойликлар Англиядаги энг қимматбаҳо жамоалардан бири - «Манчестер Сити» улушдорига ҳам айланишди. China Media Capital Holdings компанияси 13 фоиз акция учун бошқарувчи гуруҳ - Сity Football Groupга 265 млн. фунт берди. Бу сумма 8 йил олдин Abu Dhabi United Group томонидан клубни харид қилиш учун сарфланган маблағдан кўпдир. Тўғри, акциялар назорат пакети ҳамон  араб шайхи Мансурга тегишли. Келишув бўйича музокаралар 1,5 йил давом этди. Томонларнинг ўзаро тил топишишларида эса Хитой президенти Си Цзиньпиннинг Буюк Британияга расмий ташрифи муҳим аҳамият касб этди. Чин юрти раҳбари сафар чоғи клуб тузилмаси билан шахсан танишиб ҳам чиқди. Якунда China Media Capital Holdings соҳиби Ли Жуйган шартномага мувофиқ, «Сити» директорлар кенгашидан жой олди.

Сўз. «УшбукелишувХитойнингжаҳонфутболҳамжамиятигатўлақонлиқўшилишидамуҳимўринтутади. «МанчестерСити» соҳадафутболтехнологияси, шунингдек, спортватижоратлойиҳаларинимуваффақиятлиамалгаоширишибиланномқозонган. Футболчиларниянгисавиягакўтаришишлариҳамжойида. Эндишувабошқайўналишларнитенгданигаянадаривожлантиришимизкерак». Ли ЖУЙ ГАН.

12. «ВестБромвич» (Англия) - Yunyi Guokai Sports Development Limited - 178 млн. фунт

«Вест Бромвич» - бутунлай Хитой компанияси тасарруфига ўтган АПЛнинг биринчи жамоаси. Yunyi Guokai Sports инвестицион гуруҳи соҳиби Гуочуан Лай клубнинг  88 фоиз акцияси учун бизнесмен Жереми Писга тахминан 178 млн. фунт тўлади. У дарҳол ишга кириб, «ВБА» бошқарув раиси лавозимига «Блэкберн»да шу вазифани бажариб турган Жон Уильямсни таклиф қилди. Асли бромвичлик Пис эса клубда маслаҳатчи сифатида қолди. Ҳа, келишув суммаси расман ошкор қилингани йўқ. Лекин Англия матбуоти маълумотларига кўра, Пис 150 млн. фунтдан кам олган эмас.

Сўз. «Буюк клубнинг янги хўжайини бўлганимдан бахтиёрман. Ихтиёримизда кучли таркиб бор, шунингдек, мухлисларимиз таъсири ҳам катта. Муҳими, жамоамиз беқиёс тарих ва анъналарга эга. Клубда барқарор тизим шаклланишини истайман ва бу борада қўлимдан келганича ёрдам беришга тайёрман. Шунингдек, «Вест Бромвич» ўтмишига ҳурмат билан қарайман».  Гоучуан ЛАЙ.

13. «Ден Хааг» (Голландия) - United Vansen International Sport - сумма ноаниқ

Халқаро спорт мусобақалари ташкиллашга ихтисослашган United Vansen компанияси «АДО Ден Хааг»ни 2015 йил қишда сотиб олди. Айни пайт голланд жамоасининг нақ 98 фоиз акцияси компания соҳиби, йирик бизнесмен Ванг Хюй назоратида. United Vansen Италия суперкубоги учун ўйинни Пекинда ўтказгани ва «Реал» билан клуб атрибутларини Хитойда сотиш бўйича кўп миллионли шартнома тузгани орқали танилган. Лекин ҳамкорлик силлиқ бошлангани йўқ. Шу йил январда Вангнинг шартномада кўрсатилганидек сармоя киритмагани маълум бўлди. Натижада «Ден Хааг»нинг молиявий ҳолати оғирлашиб, клуб Голландия футбол федерацияси томонидан сиқувга олинди. Тўғри, хитойлик бизнесмен апрель ойида ниҳоят, клубга эътибор қарата бошлади ва уни керакли маблағ билан таъминлади. Шундан сўнг умумий ҳолат ўз маромига тушди.

Сўз. «Голландия чемпионати ҳақида гап борганида, мухлислар аввало, АДОни эслашлари керак — бизнинг мақсадимиз шундай бўлишини таъминлашдир. Хуллас, 5 йил давомида «Ден Хааг»ни бутун Европага танитмоқчимиз». Ванг ХЮЙ.

14. «Славия» Пр. (Чехия) - China Energy Company Limited - сумманоаниқ

Хитойнинг энергетик компанияси - China Energy Company Limited ўтган йили Чехия собиқ транспорт вазири Алеш Ржебичкидан «Славия» клубининг 60 фоиз акциясини сотиб олди. Келишув Чехия-Хитой савдо палатаси президенти ва мамлакатнинг собиқ мудофаа вазири Ярослав Тврдик (уклубнингашаддиймухлиси) аралашуви билан амалга оширилди. Энергетика компанияси шунинг баробарида Чехия миллий термасини 10 миллионлаб крона кўринишида молиялаштиришга рози бўлди. Хитойликлар бунинг эвазига чехлардан миллий жамоага футболчи тайёрлаш методикасини олмоқчилар. Умуман, Чин юрти вакиллари «Славия» ёрдамида еврофутболда ўз сўзларини айтмоқчилар. Ҳарқалай, узоқ муддатга мўлжалланган режа асосида клубни тараққият сари бошлашга ҳам улгуришди. Дейлик, CEFC дарҳол кўплаб янги футболчиларни таклиф этди ва етакчиларни таркибда олиб қолди. Натижада «Славия» инқироз ҳолатидан осонгина чиқиб кетди.

Ҳ.МАСАИДОВ тайёрлади