Бугун водий дербиси

Маълумингизким, водий жамоаларининг қайси турда тўқнашувидан қатъий назар ўйинлар ҳар гал кескин курашларга бой тарзда ўтиб келган. Катта эҳтимол билан бугунги навбатдаги тўқнашув ҳам бундан мустасно бўлмайди.

АШУРМАТОВ - ИСМОИЛОВ ТЎҚНАШУВИ
Бу мураббийлар ўтган йили ҳам бир-бири билан тўқнаш келган. Лекин бугунгиси умуман бошқача бўлади. Чунки водий дербисида Ашурматов ҳам Исмоилов ҳам мураббий сифатида илк учрашувини ўтказишади. Катта босим остида кечадиган баҳсда кимнинг қўли баланд келишини учрашувдан сўнг билиб оламиз. Ғалабага бўлган имконият ҳар иккала жамоада ҳам бор. Лекин майдон эгалари "Навбаҳор" футболчиларининг имконияти бирмунча кўпроқ дейиш мумкин. Чунки улар ўтган турда сафарда уч очко билан қайтган. Кайфият ҳам шунга монанд бўлиши аниқ. Нефтчи эса ҳозирча очко жамғара олмаяпти. Аммо биринчи ғалабани нишонлаш учун бор кучни сарфлаши турган гап. Бу борада омад қайси жамоага кулиб боқишини учрашувдан сўнг билиб оламиз.

УЛАР СОБИҚ ЖАМОАЛАРИГА ҚАРШИ
Бугунги ўйиннинг аҳамияти юқори эканлигига яна бир сабаблардан бири бу шубҳасиз Шукур Пўлатов, Мансур Саидов ҳамда Бахтиёр Ёқубовнинг илк бор собиқ жамоаларига қарши майдонга чиқишидир. Шунингдек бу йил "Нефтчи" сафида ҳаракат қилаётган Жаҳонгир Меҳмонов ва Рўзим Аҳмедов ҳам "Навбаҳор"нинг собиқ ўйинчилари сифатида икки ҳисса куч билан ўйнашини таҳмин қилса бўлади. Айнан мазкур холат ҳам водий дербисига бўлган қизиқишни янада оширмоқда.

МАРКАЗИЙ ЎЙИННИ ФИФА РЕФЕРИЛАРИ БОШҚАРИБ БОРАДИ
Профессионал футбол лигасининг ҳакамлар департаменти бўлими мазкур ўйинга жиддий эътибор қаратган холда Равшан Эрматов бошчилигидаги ҳакамлар гуруҳини тайинлаган. Кескин ўтиши кутилаётган учрашувни Эрматов гуруҳи бошқариб бориши ҳам тўғри танланган вариант дейиш мумкин.

КОСОНСОЙДА АНШЛАГ КЎРАМИЗМИ
Азалий рақибларнинг ҳар қандай тўқнашувида стадион мухлислар билан тўлиб тошган. Бугун Косонсойда кечадиган ўйинга ҳам маҳаллий мухлислардан ташқари Фарғонадан ҳам Нефтчининг ашаддий ишқибозларини боришини бемалол таҳмин қилса бўлади. Шундай экан бугун стадионда аншлаг бўлиши эҳтимоли бор.

Исломбек РУСТАМБЕКОВ.