Бугун футбол. "Навбаҳор" - "Пахтакор"

Мазкур учрашувга турнинг марказий ўйини сифатида қаралмоқда. Чунки иккала жамоа ҳам бугун энг яхши ўйинини кўрсатишга ҳаракат қилади. Учрашувни баҳрайнлик ҳакам Наваф Шукрулла бошқариб бориши эса ўйинга бўлган қизиқишни янада орттиради. 

Турнир жадвалида "Пахтакор" 42 очко жамғарган ҳолда якка пешқадамлик қилмоқда. "Пахтакор" ўзининг энг яқин таъқибчиси "Бунёдкор"дан олти очкога ўзиб кетган. "Навбаҳор" эса 31 очко йиғиб 4-ўринни эгаллаб турибди. 

"Навбаҳор" ҳақида гапирадиган бўлсак, бу жамоа ўтган йилдан бери ўз майдонида ютқазгани йўқ. Наманганликлар сўнгги бор 2016 йилнинг 27-турида уйда "Қизилқум"га 0:2 ҳисобида имкониятни бой берган. Шундан сўнг жамоа охирги учта турни сафарда ўтказган. 

Ўтган йилги мавсумда "Навбаҳор" ўз майдонида 15та ўйин ўтказиб, шундан 10тасида ғалаба қозонган ва беш бор дуранг ўйнаганди. Тўплар нисбати 24-11. Бу йил эса "Лочинлар" 9та ўйинда ҳаракат қилиб, шундан 7тасида зафар қучишди ва икки бор дуранг қайд этишди. Тўплар нисбати 17-2. Демак, "Навбаҳор" ўз уйида 24та учрашувдан бери мағлуб бўлмай келмоқда ва бугун ҳам шу анъанани давом эттиришга ҳаракат қилади. 

Биласизми? "Навбаҳор" Суперлига баҳслари доирасида ўз майдонида фақат иккита тўп ўтказиб юборган: "Бунёдкор" ва "Нефтчи"дан биттадан. 

Факт: "Навбаҳор" охирги бешта турнинг фақат иккитасида ғалаба қозонди. Ҳар иккала ғалаба уйдаги ўйинларда қўлга киритилди: "Қўқон-1912" 3:0 ва "Сўғдиёна" 2:0. 

Турнир жадвали пешқадами "Пахтакор" бугун ушбу мавсум ҳисобидан сафардаги 10-учрашувда майдонга тушади. Бунгача ўтказилган 9та баҳснинг 5таси ғалаба билан якун топган. Жамоа икки мартадан дуранг ва мағлубият қайд этган. Сафар ўйинларида тўплар нисбати 13-6. 

Факт: "Пахтакор" охирги уч турни кетма-кет учта ғалаба билан якунлади. Жамоа ўз майдонида "Бухоро" ва "Металлург", сафарда "Қизилқум"ни мағлуб этди. Ўтган йил Наманганда кечган ўйинда майдон эгалари 2:0 ҳисобида зафар қучишган.