Бугун футбол. “Насаф” – “Олмалиқ”

Бугунги учрашувни ФИФА рефериси Олим Толибжонов бошчилигидаги ҳакамлар гуруҳи бошқаради.

ЎзПФЛ 20-тур
“Насаф” (Қарши) – “Олмалиқ” (Олмалиқ)
08.09.2017. “Марказий” стадион. 18:45да
Бош ҳакам: Олим Толибжонов (Тошкент)
Қанот ҳакамлари: Набийжон Рўзимов, Александр Буров (Тошкент)
Захира ҳаками: Исхах Ибрагимов (Нукус)
Назоратчи: Алишер Абдуллаев (Тошкент)
ЎзПФЛ вакили: Алексей Фролов.

Олим Толибжонов жамоамизнинг бу йилги чемпионатдаги учрашувларини ҳали бошқарган эмас. Бугунги учрашув дастлабкиси бўлади.

Шу пайтгача мазкур жамоалар ўзаро 19 марта куч синашган. Шундан ўнта баҳсда “аждарлар” зафар қучишган, яна еттита ўйинда дуранг натижа қайд этилган. Иккита ўйинда олмалиқлик футболчилар ўз майдонида ғалабага эришишган. Тўплар нисбати бўйича ҳам устунлик “Насаф” тарафида - 31:17.

Қаршида бўлиб ўтган тўққиз ўйиндан еттитасида “Насаф” ғалаба қозонган. Икки учрашувда бир хил 2:2 дуранг ҳисоби қайд этилган. Кўриб турганингиздек, “Олмалиқ” жамоаси ҳанузгача Қаршида ғалаба қозона олмаган. Қаршидаги сўнгги дуранг натижа эса 2013 йили бўлган.

Қаршида бўлиб ўтган учрашувларда мазкур жамоалар ўртасида энг йирик 4:0 ҳисоби, 2010 йили қайд этилган. Бу учрашувда Илҳом Шомуродов хет-трик муаллифи бўлган. Кенжа Тўраев эса битта гол киритган.

Биринчи давранинг 5-турида бу жамоалар Олмалиқда ўзаро баҳс юритишган. Унда “Олмалиқ” жамоаси кичик 1:0 ҳисобида ғалаба қозонганини ҳам айтиб ўтиш жоиз.

Бугун “Марказий”да қизиқарли ва муросасиз курашларга бой учрашув бўлишини олдиндан тахмин қилиш қийин эмас.

Шундай экан қизиқарли учрашувни ўтказиб юборманг. “Марказий”га ташриф буюринг ва яхши ҳордиқ чиқаринг.

Мухлисларга ўйин чипталари стадион қошидаги чиптахоналарда сотилаётганини ҳам эслатиб ўтамиз.