Бугун "Ал Жазира" "Реал" билан ўйнайди, Рашидов тушмаса нимаси қизиқ?

Мусобақанинг ярим финалидан ўрин олган ушбу баҳсга эътибор юқори бўлиши мумкин эди, агарки икки беллашувда "Ал Жазира" таркибида ҳамюртимиз Сардор Рашидов майдонга тушганида. Аммо аввалги иккита ўйинда бундай бўлмади. "Ал Жазира" дастлаб "Оклэнд Сити"ни, ундан кейин "Урава Редс"ни 1:0 ҳисобида мағлуб этди, бироқ ҳар иккала учрашувда Сардор Рашидов иштирок эта олмади.

Мураббий уни захирада қолдириб, ҳатто иккинчи таймда ҳам туширмади. Мана энди бугун "Ал Жазира" Европа чемпионлар лигаси ғолиби "Реал" билан ўйнайди. Ютган финалга йўл олади. Ҳозир биз учун ким ғалаба қозонишидан кўра, Рашидовнинг майдонга тушиш-тушмаслиги бирламчи бўлиб турибди. Агар жиззахлик ярим ҳимоячи ўйинда иштирок этса, бундан ҳаммамиз хурсанд бўламиз. Мабодо яна захирада қоладиган бўлса, унда "Ал Жазира" "Реал" билан ўйнади нима-ю, бошқа билан ўйнади нима.

Х.Холиқов.