"Бенфика" афсонаси Колуна вафот этди

Португалия терма жамоаси собиқ аъзоси 78 ёшида бу дунёни тарк этди.

Колуна 16 мавсум давомида "бургутлар" билан бирга 10 марта Португалия чемпиони бўлган, 6 марта мамлакат кубогини ва икки марта Европа чемпионлар кубогини қўлга киритган. 1970 йилда "Лион"га кўчиб ўтган ва икки йил давомида ушбу клубда тўп тепган. Португалияга қайтиб "Эштрела"да футболчилик фаолиятини тугатган.

У 1935 йил Португалиянинг колоннаси ҳисобланган Мозамбикнинг Инхака шаҳрида туғилганди. Фаолиятини "Дешпортиво"да бошлаган ҳамда 1954 йил Португалияга кўчиб ўтган. "Бенфика" сафида у 677та ўйин ўтказган, уларнинг ярмидан кўпида сардор сифатида ҳаракат қилган.

Португалия терма жамоаси таркибида Колуна 57та ўйинда 7та гол урган. 1966 йилги Жаҳон чемпионатида айнан у сардорлик қилган терма жамоа учинчи ўринни қўлга киритганди. 1972 йил Колуна фаолиятини тугатган ва Мозамбик футбол федерациясида раҳбарлик қилган. Бундан ташқари бу мамлакатда спорт вазири сифатида ишлаган.

Колуна сешанба куни Мозамбик пойтахти Мапуту шаҳрида вафот этди. Уни ўпкадаги шамоллаш бу дунёдан олиб кетди. Икки ой олдин "Бенфика" ва Португалия терма жамоасининг яна бир афсонаси Эусебио вафот этганди.