Баҳром Ҳайдаров: "Ютқазаётган вақтимизда ҳам режамиздан чекинмадик ва ҳақли ғалабага эришдик"

"Бугунги ўйин тенг курашлар остида ўтди, ўйин аввалида бироз бўшашдик, футболчиларда ўз кучига ишонч бўлмади. Шу сабабли олдинга ўйнашга қўрқув бўлди, бу якунда голга олиб келди. Ўйин давомида голдан кейин йигитлар ўзига келиб олди, кейинги дақиқалар тайёрлаган режамиз асосида кечди. Ҳозир ҳиссиётлар кўп. Бир сўз билан айтганда ҳақли ғалабага эришдик. Ютқазаётган вақтимизда ҳам ўз режамиздан чекинмадик", - дейди Баҳром Ҳайдаров. 

- Бугунги ғалабани омадга қиёслаш мумкинми? "Қўқон-1912" айтарли вазият ярата олгани йўқ...

- Дарвозабон хатосини олсак омадли вазият эди дейиш мумкин. Бу режалаштирилган нарса эмасди. Мутахассислар ҳам кўрди, жамоам охирги дақиқагача курашди. Ҳақли ғалаба қўлга киритилди. Бутун ўйин давомида ҳимояланиб, қарши ҳужумда имкониятларимизни кутдик. 

- Қўл остингиздаги таркиб билан бутун мавсум давомида барқарор ўйин кўрсата олишингизга кўзингиз етяптими? Захира имкониятларингиз қандай?

- Албатта тенг кучли таркиб йиғишга ҳаракат қилдик. Футболчиларнинг кўпчлиги ўтган йили Про лигада қатнашишган. Улар кундан-кунга ўсмоқда. Таркибга Суперлигани кўрган бир неча нафар тажрибали футболчиларни ҳам жалб қилдик. Биз мураббийлар штабига ҳам кўп нарса боғлиқ. Футболчиларнинг жисмоний ҳолатини бир маромида ушлай олишимиз керак. Ҳозирча ўйлаганларимиз амалга ошмоқда.